Գումարներից խոսելով՝ Նիկոլ Փաշինյանը փորձում է ավելի խորը սեպ խրել Արցախի ու Հայաստանի միջև. Դավիթ Գալստյան
Նիկոլ Փաշինյանի ձեռքով Արցախը հայտնվել է սոցիալական եւ անվտանգային աննախադեպ ծանր իրավիճակում։ Այս մասին NEWS.am-ի հետ զրույցում ասաց ԱՀ ԱԺ «Արդարություն» խմբակցության ղեկավար Դավիթ Գալստյանը՝ անդրադառնալով ԱԺ-ում Փաշինյանի այն հայտարարությանը, թե Արցախի բյուջեի թիվն աճել է, որը պայմանավորված է վերջին երկու տարիներին ՀՀ կառավարության կողմից ֆինանսական աջակցությունով։ Ըստ Փաշինյանի՝ դա հիմնավորում է այն, որ Հայաստանը «ձեռքերը չի լվացել» Արցախից։
«Այդ մանկամիտը նախ պետք է ինքն իրեն հարց տա՝ ինչու է Արցախն այսօր այդքան սոցիալական ծրագրերի կարիք զգում, որ մի հատ էլ այդ գումարը դրոշակ սարքի ու ծածանի ամբողջ հայ ազգի գլխին որ՝ տեսեք, ես Արցախին աննախադեպ օգնություններ եմ տրամադրում։ Այդ գումարը Նիկոլ Փաշինյանի հոր ժառանգությունը չի, դա հայության հարկերից գոյացած գումարներն են։ Նիկոլ Փաշինյանը հենց գումարներից է խոսում, նա փորձում է ավելի խորը սեպ խրել Արցախի ու Հայաստանի միջեւ»,- լրատվամիջոցին ասել է Դավիթ Գալստյանը։
Նա նշել է, որ Նիկոլ Փաշինյանը չի կարող երաշխավորել Արցախի անվտանգությունը. «Եթե նա Արցախի անվտանգությունը պայմանավորում է իր ստորագրությամբ, ապա Նիկոլ Փաշինյանի ստորագրությանն անգամ ինքը չի վստահում, ինչ մնաց Արցախի բնակչությունը վստահի խաղաղության փաստաթղթին»։
