Իսրայելը թույլ չի տա Բեռլինին հակատանկային հրթիռներ մատակարարել Ուկրաինա. երկիրը մերժել է ԱՄՆ-ի խնդրանքը

Իսրայելը մերժել է ԱՄՆ-ի խնդրանքը՝ թույլ տալ Բեռլինին Ուկրաինա հակատանկային հրթիռներ մատակարարել: Խոսքը իսրայելական տեխնոլոգիաների և լիցենզիայի կիրառմամբ Գերմանիայում արտադրվող Spike հրթիռների մասին է։ Այս մասին հայտնում է Axios-ը՝ հղում անելով ԱՄՆ-ի և Իսրայելի ներկայացուցիչներին։
 

Իսրայելի պաշտպանության նախարարության գլխավոր տնօրեն Ամիր Էշելը և ԱՄՆ պաշտպանության նախարարի քաղաքականության գծով տեղակալ Քոլին Քալը բանակցություններ են վարել Վաշինգտոնում։ Վերջինս հարցրել է, թե Թել Ավիվը կտա՞ Գերմանիային Ուկրաինա հակատանկային հրթիռներ փոխանցելու թույլտվություն, ինչին բացասական պատասխան է ստացել։

Էշելը բացատրել է, որ Իսրայելը Կիև կմատակարարի միայն ոչ մահաբեր ռազմական տեխնիկա: Իսրայելի իշխանությունները մտավախություն ունեն, որ ռուս զինվորները կարող են սպանվել իրենց երկրում արտադրված զենքերով, ինչը կարող է հանգեցնել նրան, որ Ռուսաստանը վնասի Իսրայելի շահերին Սիրիայում։