ՏԵՍԱՆՅՈՒԹ. Թուրքիայում մի խումբ թուրքեր ծեծի են ենթարկել սիրիացի փախստականին
Թուրքիայի Թեքիրդաղ քաղաքում մի խումբ թուրքեր հարձակվել են հարձակվել են սիրիացի փախստականի վրա: Այս մասին գրում է Инфотека24-ը՝ հրապարակելով նաև տեսանյութը:
Լրատվամիջոցը գրում է, որ կադրերը հրապարակել է ամերիկացի լրագրող Լինդսի Սնելը: Կադրերում երևում է, թե ինչպես է թուրք տղամարդկանց խումբը Թեքիրդաղում հալածում և ծեծի ենթարկում սիրիացի փախստականին:
Հատկանշական է, որ մարդկանց մեկ այլ խումբ էլ լուռ հետևում է տեղի ունեցողին։
«Այդ «թուրք-սիրիական եղբայրության» պատկերն է, որի մասին խոսում էր Էրդողանը»,- գրել է Սնելը։
Հիշեցնենք, որ Էրդողանը և նրա կառավարությունը մտադիր են մեկ միլիոն փախստական վերադարձնել Սիրիայի հյուսիսում գտնվող օկուպացված շրջաններ։ Հավանական է, որ Թուրքիայում սիրիացիների նկատմամբ հալածանքները, որոնք վերջին շրջանում հաճախակիացել են, ուղղված են հատկապես կառավարության այս ծրագրի իրականացմանը։
