Իտալիան ձերբակալել է «Շեհերեզադա» զբոսանավը, որը կապում են Պուտինի անվան հետ
Իտալիայի իշխանությունները մայիսի 6-ին ձերբակալել են «Շեհերեզադա» թանկարժեք զբոսանավը, որը, ինչպես պնդում են ընդդիմադիր գործիչ Ալեքսեյ Նավալնիի համախոհները, փաստացի պատկանում է Ռուսաստանի նախագահ Վլադիմիր Պուտինին: Հայտնում է dw.com-ը:
Զբոսանավը ձերբակալվել է Մարինա դի Կարարա նավահանգստում։ Իտալիայի Էկոնոմիկայի եւ ֆինանսների նախարարության հաղորդագրության մեջ չի ասվում, թե ով է զբոսանավի իրական տերը: Իշխանությունները միայն պնդում են, որ իտալական ֆինանսական ոստիկանության կողմից իրականացված հետաքննությունը ցույց է տվել, որ նավը "զգալի տնտեսական եւ գործնական կապեր" է ունեցել ռուսական կառավարության բարձրաստիճան եւ Եվրամիության պատժամիջոցների տակ գտնվող անձանց հետ:
«Շեհերեզադա» զբոսանավը գրանցված է Կայմանյան կղզիներում եւ պատկանում է օֆշորային Bielor Asset Limited ընկերությանը, որի շահառուն անհայտ է: SuperYachtFan կայքի գնահատմամբ ՝ նավը 700 մլն դոլար արժե։
