ԼՈՒՍԱՆԿԱՐՆԵՐ. «Բոլորը պետք է ծննդաբերության գային, ոչ թե թաղման». ողբերգական վրաերթից մահացած հղի կնոջ ամուսնու գրառումը
Ապրիլի 26-ին ՀՀ վարչապետ Նիկոլ Փաշինյանին ուղեկցող ՃՈ ծառայության ուղեկցող սպայական վաշտի հրամանատար վրաերթի էր ենթարկել 29-ամյա հղի կնոջը՝ Սոնա Մնացականյանին: Կինն ու և չծնված փոքրիկը մահացել են: Ողբերգական դեպքից հետո Սոնայի ամուսինը՝ Աշոտ Վարդանյանը իր ֆեյսբուքյան էջում հերթական գրառումն է կատարել:
Ծավալուն հրապարակման մեջ նա պատմել է Սոնայի, նրա կյանքի, հետաքրքրությունների, բնավորության, ինչպես նաև անձնականի, այդ թվում՝ իրենց առաջին հանդիպման ու սիրո պատմության մասին:
«Երեկ հոգեհանգստի արարողությունն էր։ Մեկ շաբաթ առաջ ես չգիտեի, թե դա ինչ է: Երեկ ես նստած էի դագաղի կողքին՝ մեջը՝ կյանքիս սերը ու երեխաս։ Նա չափազանց կենտրոնացած էր ուրիշների վրա, ուստի ես պետք է պատմեմ նրա պատմությունը, գոնե մի փոքր մասը:
Մի աղջիկ կար, որին ոչ ոք չէր ճանաչում։ Ոմանք տեսել են նրան, իսկ ոմանք խոսել են նրա հետ: Ոմանք նրա ընկերներն էին, իսկ ոմանք՝ հարազատները, բայց նա շատ ավելին էր, քան որևէ մեկը կարող էր պատկերացնել: Նրա անունը Սոնա էր։ Նա մի պատմություն ուներ. սիրով ու ցավով լի կարճ, ողբերգական պատմություն: Բոլորը պետք է գային. ծննդաբերության, ոչ թե թաղման համար»,-գրել է Վարդանյանը:
Խոսելով Սոնայի հետ առաջին հանդիպման մասին՝ տղամարդը վերհիշել է, որ դա տեղի է ունեցել գիտության, տեխնոլոգիայի և լրագրության թեմաներով միջոցառման ժամանակ:
«Ես նայեցի նրան մեկ, երկու անգամ, հետո նա մոտեցավ ինձ... սկսվեց պանելային քննարկումը։ Ես բեմում եմ. Նա ամբոխի մեջ է։ Ես լռում եմ, նայում եմ նրան։ Երբ միջոցառումն ավարտվում է, նա մեզանից մի քանիսին հրավիրում է ընթրիքի...»,-գրել է Վարդանյանը:
«Մենք միասին էինք ընդամենը 8 երջանիկ ամիս... Դա շատ քիչ է: Մեր աղջիկը 7 ամսական էր: Նա աշխարհի ամենասպասված և ամենասիրված երեխան էր... Նա եզակի կլիներ: Լավագույնը մեզանից: Նույնքան գեղեցիկ և խելացի, որքան մայրիկը: Սոնան ասաց, որ ես աշխարհի ամենաուժեղ տղամարդն եմ, և մեր աղջիկն ինձ նման կլինի։ Ես ուժեղ էի միայն այն պատճառով, որ նա ինձ հետ էր»,-գրել է տղամարդը:
