Մոլդովան դուրս է գալիս ԱՊՀ-ից
Քիշնևը սկսել է Անկախ Պետությունների Համագործակցությանը (ԱՊՀ) Մոլդովայի անդամակցության հիմքում ընկած երեք հիմնարար համաձայնագրերի չեղարկման գործընթացը։ Այս մասին «Ռադիո Մոլդովայի» եթերում հայտարարել է արտաքին գործերի նախարար Միհայ Պոպշոյը՝ ընդգծելով, որ այդ համաձայնագրերի դադարեցումից հետո, պաշտոնապես և իրավաբանորեն, «Մոլդովան այլևս չի լինի ԱՊՀ-ի մաս», չնայած այն հանգամանքին, որ նրա անդամակցությունն արդեն կասեցվել էր «որոշ ժամանակ առաջ»։
Մոլդովայի փոխվարչապետը և արտաքին գործերի նախարարը պարզաբանել է, որ վիճելի համաձայնագրերը վերաբերում են 1993 թվականի հունվարի 22-ին Մինսկում ստորագրված ԱՊՀ կանոնադրությանը, 1991 թվականի դեկտեմբերի 8-ի ԱՊՀ ստեղծման մասին համաձայնագրին և այդ համաձայնագրի 1991 թվականի դեկտեմբերի 22-ի հավելվածին։ Պոպշոյի խոսքով՝ չեղարկման գործընթացն արդեն ընթացքի մեջ է, և խորհրդարանի անդամները համապատասխան փաստաթղթերը կքննարկեն նոր խորհրդարանական նստաշրջանի հենց սկզբում։
«Մենք, հավանաբար, կավարտենք կառավարության ընթացակարգերը փետրվարի կեսերին, որից հետո որոշումը կկայացնի խորհրդարանը», - նախարարի խոսքերն է մեջբերել Մոլդովայի պետական լրատվական «Մոլդպրես» գործակալությունը։
Միհայ Պոպշոյը Մոլդովայի ԱՊՀ անդամակցության համաձայնագրերի չեղարկումը անվանել է «կարևոր քայլ երկրի եվրոպական կողմնորոշումը ամրապնդելու գործում»։
