ՈՒԵՖԱ-ն արձագանքել է Չեմպիոնների լիգայի եզրափակիչը Ռուսաստանից տեղափոխելու հնարավորությանը
ՈւԵՖԱ-ն պնդում է, որ Ռուսաստանի ու Ուկրաինայի միջև պատերազմի վտանգի ֆոնին Չեմպիոնների լիգայի ընթացիկ մրցաշրջանի եզրափակիչը Սանկտ Պետերբուրգից տեղափոխելու պլաններ չկան:
«ՈՒԵՖԱ-ն ուշադրությամբ հետևում է իրավիճակին: Ներկա պահին հանդիպման վայրը փոխելու պլաններ չկան»,- նշված է ՈՒԵՖԱ-ի հաղորդագրության մեջ:
Հիշեցնենք, որ նախօրեին Ռուսաստանի Դաշնության նախագահ Վլադիմիր Պուտինը Դոնեցկի և Լուգանսկի հանրապետությունների անկախությունն ու սուվերենությունը ճանաչելու հրամանագիր է ստորագրել: Պուտինի հրամանագրով՝ ՌԴ զորքերը այնտեղ խաղաղապահ պարտականություններ կստանձնեն:
Հիշեցնենք՝ Չեմպիոնների լիգայի ընթացիկ մրցաշրջանի եզրափակիչը նշանակված է մայիսի 28-ին՝ Սանկտ Պետերբուրգի «Գազպրոմ Արենա» ստադիոնում: Ավելի վաղ միջազգային մամուլում տեղեկություն է տարածվել, թե Ռուսաստանի և Ուկրաինայի միջև հակամարտության ֆոնին ՈՒԵՖԱ-ին այլ տարբերակ չի մնում, քան եզրափակչի վայրը փոխելը: Հավանական անցկացման վայրերի թվում նշվում էր Լոնդոնի «Ուեմբլի» ստադիոնը:
