400-ից ավել գորիսեցի է հարցաքննվել. Իրինա Յոլյան․ AD TV

AD TV «Հարցազրույցի» ժամանակ Գորիսի նախկին փոխհամայնքապետ, Առուշ Առուշանյան դաշինքի անդամ Իրինա Յոլյանն ասաց, որ իրենց հասած տեղեկություններով, Որոտանի մոտ տեղադրված ադրբեջանական ոստիկանական կետում կանգնեցրել են հայկական երեք ավտոմեքենա ու ստուգումներ իրականացվել։

Նա նշեց, որ սրանք սպասելի զարգացումներ էին, քանի որ երբ ադրբեջանցիները քարեր էին նետում, սպառնալից նշաններ էին ցույց տալիս երթևեկող մարդկանց՝ իրենք զգուշացնում էին, որ այդ ամենը իրենց հետևանքներն ու զարգացումներն են ունենալու։

Յոլյանը նշեց, որ եթե սկզբում այդ ոստիկանական կետում ընդամենը 20 ադրբեջանցի կար՝ այժմ նրանց թիվը հասնում է 8 տասնյակի և երաշխիք չկա, որ նրանց թիվն ավելի չի շատանա։ Ավելին, այդտեղ երեք տարբեր ուժային կառույցների ադրբեջանցի աշխատակիցներ են ներգրավված։

 

Նա նշեց, որ վեց տեսախցիկ ճանապարհի վրա է տեղակայված և չորսը իրենց ոստիկանական կետի։ Բացի այդ, ադրբեջանցիները հավաքագրում են այդ ճանապարհով երթևեկող հայ և իրանցի ուղևորների ու վարորդների անձնական տվյալները, ինչը վտանգավոր հետևանքներ կարող է ունենալ։

Յոլյանը կարծում է, որ եթե Սյունիքի համայնքապետերն ազատության մեջ լինեին՝ նրանք ամեն կերպ կընդդիմանային ադրբեջանցիների կողմից իրականացվող ոտնձգություններին ու հնարավոր է այս պատկերը չլիներ։

 

Ինչ վերաբերում է Առուշ Առուշանյան դաշինքին, Յոլյանը նշում է, որ չնայած իշխանության կողմից իրենց հանդեպ կիրառվող քաղաքական ճնշումներին, ինքը հավատում է գորիսեցիների կամքին ու որ անկախ ճնշումներից՝ նրանք կկատարեն ճիշտ ընտրություն։

Առուշ Առուշանյանի քրեական գործի վերաբերյալ Գորիսի նախկին փոխհամայնքապետը նշում է, որ 400-ից ավել գորիսեցիներ են հարցաքննվել, որոնցից միայն մեկի՝ Լուսինե Ավետյանի՝ մի քանի անգամ փոփոխված ցուցմունքով էլ Առուշանյանին զրկել են ազատությունից։