Գործադիրն իմ խառնվածքին ավելի բնորոշ է. ԱԺ-ն ծափերով ճանապարհեց Արմեն Փամբուխչյանին
Արմեն Փամբուխչյանը գործադիրում իր ծառայություններն ավելի արդյունավետ կարող է մատուցել, ահա թե ինչու որոշում կայացրեց օրենսդիրից նորից գործադիր վերադառնալ: Այդ մասին Փամբուխչյանն ասաց լրագրողների հետ զրույցում՝ ավելացնելով, որ տեղափոխության հետ կապված այլ խնդիր չկա. «Գործադիրն իմ խառնվածքին ավելի բնորոշ է»:
Արտակարգ իրավիճակների փոխնախարար է աշխատելու: Գերատեսչության մասով իր ծրագրերի մասին ասաց, որ հետո կխոսի:
Հարցին՝ «Իմ քայլից» այլ անձինք և՞ս ուզում են մանդատը վայր դնել, և արդյոք քննարկումներ են եղել, պատասխանեց. «Քննարկումներ չեն եղել»:
Ի դեպ՝ Փամբուխչյանը նաև տեղեկացրեց, որ իր մշակած ծովային օրենսդրությունը գրեթե պատրաստ է: Այժմ փորձաքննություն է անցնում:
Արմեն Փամբուխչյանն, օգտվելով արտահերթ նիստում ընձեռված հնարավորությունից, ԱԺ ամբիոնից վերջին ելույթն ունեցավ։
Պատգամավորը հիշեցրեց, որ սեպտեմբերի 17-ին պատգամավորական մանդատից հրաժարվելու դիմում է ներկայացրել, որն ընդունելու ժամկետը լրանում է վաղը` սեպտեմբերի 24-ին։ Հետևաբար, այսօր ԱԺ պատգամավորի կարգավիճակով ինքը վերջին անգամ է մասնակցում ԱԺ նիստին։
Պատգամավորն իր ելույթում շնորհակալություն հայտնեց գործընկերներին։
«Հատկապես այն պատգամավորներին, որոնց հետ, անկախ իրենց քաղաքական հայացքներից ու ֆրակցիայից, կարողացանք կառուցել մարդկային ջերմ ու լավ հարաբերություններ»,– ասաց Փամբուխչյանը` ԱԺ–ում մնացող գործընկերներին մաղթելով ուժ, եռանդ, սեր և համերաշխություն։
Խորհրդարանը ծափահարություններով ճանապարհեց մանդատը վայր դրած գործընկերոջը։
