Աջարիան «կարմիր գոտի է» հայտարարվել
Թբիլիսիի ինֆեկցիոն հիվանդանոցի բժշկական կենտրոնի տնօրեն Մարինա Էզուգբայայի հայտարարությամբ՝ երկրում վարակվածների թվի ավելացումը ցույց է տալիս, որ կորոնավիրուսի տարածումը Վրաստանում դարձել է ինտենսիվ և կասկածի տակ է դնում վերահսկելիությունը։
Ըստ այդմ՝ վերջին երկու շաբաթվա ընթացքում երկրում հիվանդության հաստատվող դեպքերի մակարդակը փոխվել է։ Առավել մտահոգիչ է իրավիճակն Աջարիայում։ Վերջին 24 ժամում Վրաստանում կորոնավիրուսով վարակման ռեկորդային՝ 45 նոր դեպքից 23-ը արձանագրվել է Աջարիայում:
«Աջարիայում ավելի լուրջ իրավիճակ է, այնտեղ դեպքերի ցուցանիշը 42,4 տոկոս է, ինչը նշանակում է, որ Աջարիան համարվում է «կարմիր գոտի»։ Կարծում եմ՝ Աջարիայում լրացուցիչ միջոցառումներ անցկացնելու կարիք կլինի: Այսպես, օրինակ, անհրաժեշտություն կլինի վերահսկման մեխանիզմն ուժեղացնել և ընդլայնել թեստավորման մասշտաբները»,- լրագրողների հետ հանդիպմանը հայտարարել է Մարինա Էզուգբայան:
