ՏԵՍԱՆՅՈՒԹ. Վարդենիսում խուզարկությունների ժամանակ իրավապահները հրազեն ու թմրամիջոցներ են հայտնաբերել

Հարուցված քրեական գործի շրջանակներում ձեռնարկված միջոցառումների շնորհիվ ոստիկանության Գեղարքունիքի մարզային վարչությունում ստացված օպերատիվ տվյալներն իրացնելիս Քրեական ոստիկանության գլխավոր վարչության, Գեղարքունիքի մարզային քննչական վարչության ծառայողներն ու Վարդենիսի ոստիկանները հուլիսի 21-ին, դատարանի որոշմամբ, խուզարկություններ կատարեցին։ Այս մասին տեղեկացնում է ՀՀ Ոստիկանությունը։

Արդյունքում` տարբեր վայրերից հայտնաբերվեցին և առգրավվեցին գործարանային համարով թմբուկավոր ատրճանակ՝ լիցքավորված 7,62 մմ տրամաչափի յոթ փամփուշտով, ատրճանակի դատարկ պահունակ, տարբեր տրամաչափի և հրազենների փամփուշտներ, հրացանի դետալներ, դանակներ, տարբեր փաթեթներով մարիխուանայի նմանվող զանգվածներ՝ ընդհանուր 70 գրամից ավելի քաշով, կաթուցիչներ և այլն։

Նշանակվել են մի շարք փորձաքննություններ։ Հարուցված քրեական գործի շրջանակներում օպերատիվ-հետախուզական միջոցառումներն ու քննչական գործողությունները շարունակվում են։