Սուպերմարկետի մոտ դանակներով զինված քաղաքացիներ են վիճաբանել. 25-ամյա երիտասարդը դանակահարել է երկու հոգու

Հուլիսի 21-ին, ժամը 20.20-ի սահմաններում, ոստիկանության Երեւան քաղաքի վարչության օպերատիվ կառավարման կենտրոն, րոպեների տարբերությամբ, 4 ահազանգ ստացվեց։ Հայտնում էին, որ Քաջազնունու փողոցի սուպերմարկետի մոտ դանակներով զինված քաղաքացիներ են վիճաբանում:

Քիչ անց ոստիկանությունում ստացվեցին նաեւ հիվանդանոցային ահազանգեր։ Թիկունքի կտրած-ծակած վերքով հիվանդանոց բուժօգնության էր տեղափոխվել 55-ամյա մի տղամարդ, իսկ կրծքավանդակի կտրած-ծակած թափանցող վերքով 86-ամյա մի տղամարդ տեղափոխվել էր մայրաքաղաքի մեկ այլ հիվանդանոց։

Ոստիկանությունում հնչած առաջին ահազանգից րոպեներ անց ոստիկանության Կենտրոնական բաժնի օպերատիվ խումբն արդեն դեպքի վայրում էր։ Քրեական հետախույզների ձեռնարկած օպերատիվ-հետախուզական միջոցառումների շնորհիվ պարզվեց, որ տուժածները վնասվածքները ստացել են ժամը 20.15-ին, Քաջազնունու փողոցի 8-րդ շենքի բակում տեղի ունեցած վիճաբանության ժամանակ։ Ոստիկանների արդյունավետ եւ օպերատիվ գործողությունների արդյունքում պարզվեց նաեւ տղամարդկանց դանակահարած անձի ինքնությունը՝ Երեւան քաղաքի 25-ամյա բնակիչ էր։ Ժամը 21.20-ին նա հայտնաբերվեց Կրիվոյի փողոցում եւ հասակակից մեկ այլ երիտասարդի հետ բերման ենթարկվեց ոստիկանության Կենտրոնական բաժին:

Կասկածվողի մոտ ոստիկանները հայտնաբերեցին հանցագործության գործիք դանակը:

Փաստի առթիվ հարուցվել է քրեական գործ։

25-ամյա երիտասարդը ձերբակալվել է:

Կատարվում է նախաքննություն: