Պեսկովի աղջիկը՝ հոր հոսպիտալացման լուրի մասին
Ռուսաստանի նախագահի՝ կորոնավիրուսով վարակված մամուլի խոսնակ Դմիտրի Պեսկովի դուստրը՝ Ելիզավետան, անդրադարձել է հոր հոսպիտալացման մասին լուրերին: Gazeta.ru-ի հետ զրույցում Ելիզավետան պատմել է, որ վերջին անգամ հոր հետ շփվել է շուրջ 10 օր առաջ:
Աղջիկը պատմել է, որ չի ապրում ծնողների հետ, հետևում է անվտանգության բոլոր ցուցումներին: Ելիզավետայի խոսքով՝ օրվա ընթացքում մի քանի անգամ զանգահարում է հորը: Աղջիկը, սակայն, հոր առողջական վիճակի մասին հրաժարվել է խոսել՝ նշելով, որ անհանգստանում է վերջինիս առողջության համար:
«Հուսով եմ, որ «խելոքները», որոնք կարծում են, որ կորոնավիրուս չկա, գիտակցում են վիճակի լրջությունը»,- ասել է Ելիզավետան:
Ինքը՝ Ելիզավետան, իրեն լավ է զգում:
