Վրաստանը Covid-19-ից մահացածների թաղման նոր կարգ է մշակել. «Ալիք Մեդիա»

Վրաստանի առողջապահության նախարարությունն  ու Հիվանդությունների վերահսկողության ազգային կենտրոնը մշակել են COVID 19-ից մահացածների  հուղարկավարության կարգ: Այս մասին հայտնում է «Ալիք Մեդիան»:
 

Խորհրդատվություններ են  արվել, որպեսզի նվազագույնի հասցվի կորոնավիրուսից մահացածների միջոցով վարակի հետագա տարածումը: Ըստ առողջապահության նախարար Եկատերինե Թիկարաձեի հրամանի՝ պարտադիր կետեր են.
 

• Կորոնավիրուսի ախտորոշմամբ հանգուցյալին տեղավորել դիերի համար նախատեսված պարկում, դրսից փակցվում է վարակի միջազգային խորհրդանիշը:
• Կատարվում է պարկի ու դիակի ախտահանում
   
• Դին հիվանդանոցից տեղափոխվում է պարկով, որի բացելն արգելվում է հուղարկավորելու ցանկացած պահին:
   
• Հանգուցյալի հուղարկավորությունը պարտադիր պետք է կատարվի ժամանակին՝ ոչ ավել քան 72 ժամ, նաև խուսափել բազմամարդ հոգեհանգստի արարողությունից:
   
• Կորոնավիրուսի հաստատվելու կամ կասկածի դեպքում բացառվում է դիակի զմռսումը, կամ այլ հավելյալ շփումը, այդ թվում դիահերձումն՝ առանց համապատասխան անհրաժեշտության:
   

Համապատասխան (սգո) ծառայությունը պետք է տեղեկացվի մահն արձանագրվելուց հետո ոչ  ուշ քան մեկ ժամում, իսկ ընտանիքի անդամները պետք է իրազեկված լինեն ժամանակին տեղափոխման մասին:
 

Նման միջոցներ արդեն ձեռնարկվել են մի շարք երկրներում, որտեղ հիվանդությունը հասցրել է տարածվել, ու մահվան դեպքեր են գրանցվել: Օրինակ՝ Իտալիայում, ուր մահացածների թիվն անցել է 8000-ից, արգելվել է  հանգուցյալին կարգի բերել, իսկ թաղման սրահներ տեղափոխում են փակ դագաղներով, որոնք բացելու իրավունք հարազատները չունեն: Իտալիայում նաև արգելվել է թաղմանը 2-ից ավել  մարդու ներկայությունը:

Հիշեցնենք՝ Վրաստանում մահվան դեպք չկա, Վրաստանի 3 քաղաքացի մահացել է Իսպանիայում բռնկման ժամանակ: