Վաղ առավոտից լարված իրավիճակ է «Սրբ. Գրիգոր Լուսավորիչ» Բժշկական կենտրոնում: Հիվանդանոցի աշխատակիցները լրատվամիջոցներին հայտնում են, որ իրենց ստիպում են աշխատանքից հեռացման դիմում գրել: Ըստ աշխատակիցների հիվանդանոցում կադրային ջարդ է սկսվել և այս ամենը արվում է առանց որևէ հիմնավոր պատճառի: 

Աշխատակիցները պնդում են, որ ԲԿ-ի տնօրենը` Արման Հովակիմյանը, 2 տարի է, ինչ նշանակվել է այդ պաշտոնում, սակայն բավականին շատ ազատումներ է արել: «Հանում է բաժնի վարիչներին, իր մարդկանց է բերում»:

Auroranews-ը կապ հաստատեց բժշկական կենտրոնի մամուլի պատասխանատու Ծովինար Խաչատրյանի հետ, որը մեզ հետ զրույցում ստեղծված իրավիճակը մեկնաբանելով ասաց, որ այսօր եղել են աշխատանքից ազատման դեպքեր, սակայն հիվանդանոցում լարված իրավիճակ չէ: 

«ԲԿ-ն վաղ առավոտից աշխատում է իր բնականոն հունով, որևէ խնդիր չկա, սակայն ինչ վերաբերում է դեպքին, երբ ասում են` աշխատակիցներին ստիպում են ազատման դիմում գրել, դա այդպես չէ: Իրականում տեղի է ունեցել աշխատանքի պարտականությունների խիստ թերացում, իսկ այն աշխատակիցները ովքեր թույլ են տվել այդ թերացումը պատժի են արժանացել»,- ասաց Խաչատրյանը: 

Հարցին` ինչ թերացումների մասին է խոսքը խոսնակն ասաց, որ թերացումների վերաբերյալ տվյալ պահին չեն մանրամասնի, միայն կասեն, որ աշխատակազմի մեկ հեթափոխ ` 3 անձ, թույլ է տվել աշխատանքի կոպտագույն խախտում, որին ի պատասխան հիվանդանոցը արձագանքել է օրենքի շրջանակներում: 

Խաչատրյանն ասաց, որ աշխատակիցները էմոցիոնալ են արձագանքել միջադեպին և լրատվամիջոցներին պատմում են իրավիճակը այնպես, ինչպես իրենց է հարմար և անտեսում են իրականությունը: 

«Հիվանդանոցը կարձագանքի և կմեկնաբանի ստեղծված իրավիճակը: Այս պահին կարող եմ ասել այդքանը»,- ասաց խոսնակը: 

Մանրամասները NEWS.am-ի տեսանյութում: