Ճնշումների քանակը չկառավարելու և չնվազեցնելու դեպքում Սևանի խնդիրները գնալով կխորանան. նախարար Էրիկ Գրիգորյան
Սևանա լճի մակարդակը երեկվա դրությամբ 4 սմ-ով ավելի էր, քան նախորդ տարի նույն օրը: Սա մոտավորապես 50 մլն խմ ավելի ջուր է կազմում, այսօր հրավիրած քննարկման ժամանակ ասաց Շրջակա միջավայրի նախարար Էրիկ Գրիգորյանը:
«Եվ սա չնայած նրան, որ այս տարի ունեցել ենք 100 մլն խմ ավելի գոլորշիացում և 40 մլն խմ պակաս տեղումներ: Եվ եթե այս թվերը լինեին միջին վիճակագրականին մոտ, ապա այս պահին կունենայիքն ոչ թե 4 սմ-ով ավելի ջուր, այլ ևս մոտ 10 սմ-ով ավելի: Ինչո՞ւ եմ ես քանակի մասին խոսում, որովհետև քանակն անմիջական կապ ունի որակի հետ: Խնդիրներն առաջացել են այն ժամանակ, երբ քանակի և լճի ծավալի հետ սկսել են տարբեր գործողություններ իրականացնել»,- ասաց նախարարը:
Էրիկ Գրիգորյանը նշեց, որ 2007 թվականից սկսած լճում անշեղորեն աճում է որոշակի օրգանական նյութերի և, մասնավորապես, ֆոսֆորի պարունակությունը, որը խախտում է հավասարկշռությունը: «Մի կողմից մենք ունենք խնդիր, որ մասսայական կեղտաջրեր են լցվում լիճ: Եվ այդ կեղտաջրերը լցվում են Գեղարքունիքի մարզի համարյա բոլոր համայնքներից, բացառությամբ ավելի ցածր գոտում գտնվողներից: Եթե մենք ունենք 94 համայնք, դրանցից հանենք Սևանն ու Ճամբարակը և ևս մի քանի գյուղ, ապա մնացած բոլոր համայնքներից կեղտաջրերն առանց մաքրվելու ուղղակի լցվում են Սևանա լիճ»,- ասաց նա:
Լճի որակի վրա մեծ ազդեցություն ունի նաև անասնապահությունը: Մյուս խնդիրը, ըստ նախարարի, ափամերձ հատվածների ոչ պատշաճ մաքրման աշխատանքներն են, որոնք իրականացվել են նախկինում և որոնց մասով հարուցված քրեական գործեր կան: Որոշակի ճնշում կա ցանցավանդակային տնտեսությունների կետերից արտազատվող ֆոսֆորի գործոնով պայմանավորված:
«Եվ մեկ էական փաստ նույնպես կա, որը շատ չի բարձրաձայնվում, դա կոմունալ կենցաղային աղբն է, որը այդ բոլոր համայնքների կողմից լցվում են գետերի հուներ, և հետո այդ ամբողջ նյութերը լցվում են Սևանա լիճ: Այսինքն՝ այս ամբողջ գործոնների համագումարը հանգեցրել է այս իրավիճակին»,- նշեց նա:
Ըստ նախարարի՝ քայլեր արդեն արվում են՝ երեք քաղաքների կեղտաջրերի կայանների կառավարման մասով նախարարությունն ուսումնասիրություններ է իրականացվել, փոխանցվել է վարչապետի աշխատակազմ: Արդեն հանձնարարական է տրված Տարածքային կառավարման նախարարությանը, որպեսզի նախահաշիվները կազմեն և սկսեն այդ մաքրման կայանների կառուցման աշխատանքները: Զուգահեռ աշխատանքներ են իրականացվում գետերի հուներն ու գետաբերանները մաքրելու ուղղությամբ:
