Մատենադարանի հարևանությամբ 3 հաստաբուն ծառ է հատվել
Երևանում՝ Մատենադարանի հարևանությամբ 3 հաստաբուն ծառ է հատվել։ Ծառը հատողները վստահեցնում են՝ իրենք առողջ ծառեր չեն կտրել՝ դրանք ծերացել էին։ Կենտրոն վարչական շրջանի Ծառերի ձևավորման բաժնի պետ Լևոն Հովհաննիսյանը Tert.am-ի հետ զրույցում պարզաբանեց, որ եկել են ահազանգի հետքերով և պարզել, որ բարդիների արմատային համակարգը փտել էր։
«Գիշերը 2։30 Մաշտոցի 49 հասցեից ահազանգ ենք ստացել, որ բարդի է այրվում, ԱԻՆ-ը տեղում է։ Լինելով տեղում՝ մենք պարզեցինք, որ ծառը խորը էտի ենթարկված արծաթափայլ բարդի է, որն ունի փչակ, իսկ արմատային համակարգը լրիվ փտած է։ Հրդեհը երեկոյան կանխելուց հետո որոշեցինք առավոտյան իրականացնել հատման աշխատանքներ»,- ասաց նա։
Հովհաննիսյանը նշեց՝ հատված 3 բարդին տարիքն անց էին, քանի որ բարդիներ ապրում են 35-40 տարի, իսկ այս ծառերը 50-60-ի մոտ են։ Նա վստահեցրեց, որ աշնանն այս ծառերի փոխարեն նորերը կտնկվեն։
