Կարճ ժամանակ հետո Երևանում առանց գծանմուշների քիչ փողոցներ կմնան. ՃՈ պետ
Տեսախցիկներ ու արագաչափեր տեղադրելն ինքնանպատակ չէ: Լրագրողների հետ զրույցում նման տեսակետ հայտնեց ՀՀ ՃՈ պետ Եգոր Կարապետյանը: Արագաչափերի տեղադրման վերաբերյալ նա տեղեկացրեց, որ ուսումնասիրություն է կատարվում, երբ այն լինի, կդիմեն քաղաքապետներին, գյուղապետներին, եթե միջպետական ճանապարհն այնտեղով է անցնում: Կարապետյանը հայտնեց՝ արագաչափ տեղադրվելու է, եթե նրանց թույլտվությունը ստանան: Տեսախցիկներն, ըստ ՃՈ պետի, նույն տեղում են, չեն հանվել, իսկ արագաչափերի պարագայում միայն սահմանված 60 կմ/ժ արագությունից ցածրն է հանվել:
ՃՈ պետը խոսեց նաև գծանշումներից, ասաց՝ նախորդ տարի եղանակն ավելի բարենպաստ էր, գծանշումները շուտ սկսեցին, բայց այս տարի եղանակի անբարենպաստ պայմանների պատճառով չէին կարող շուտ անել:
«Իհարկե, 10 օրից ավել է՝ գծանշումները սկսել ենք, ասֆալտը պետք է համապատասխան ջերմություն ունենա, որ ներկը չփչանա: Աշխատանքները կատարվում են գիշերային ժամերին, կարճ ժամանակ անց քիչ փողոցներ կմնան, որ գծանշված չլինեն»,- ասաց նա՝ տեղեկացնելով, որ գծանշումներն արվում են լուսանդրադարձիչ ներկերով, որ գիշերային ժամերին էլ վարորդների համար տեսանելի լինեն:
