Բացի երկրորդ նախագահ Ռոբերտ Քոչարյանից, ՄԻՊ զեկույցում այլ պաշտոնատար անձիք ևս ընդգրկված են՝ Միքայել Հարությունյան, Վահագն Հարությունյան, Մանվել Գրիգորյան․ ԱԺ-ում լրագրողների հետ զրույցում այս մասին ասաց ՄԻ պաշտպան Արման Թաթոյանը։ «Մանվել Գրիգորյանի հետ կապված՝ կոնկրետ լուրջ առողջական խնդիրներով պայմանավորված հարց կար, և հիմա էլ Մանվել Գրիգորյանը գտնվում է «Նաիրի» բժշկական կենտրոնում, բուժումներ է ստանում, ընդ որում, մեր կանխատեսմամբ՝ դա պետք է, որ երկարատև բուժում լինի»,-ասաց Թաթոյանը։ ՄԻ պաշտպանն ասաց, որ իրենք բարձրաձայնել են հարց, որ քննարկվի հիվանդությունների և կալանքի համատեղության, նաև բժշկական ծառայությունների որակի և համապատասխան մատչելիության հարցը։ Հարցին, թե Մանվել Գրիգորյանի կյանքի հետ կալանքը համատեղելի՞ է, պաշտպանն ասաց, որ հարցը քննարկվում է, և ինքը չի կարող գնահատական տալ։