Վարչապետը պետք է կարողանա մեր երկիրը խցկել Մետաքսի ճանապարհի ծրագրերի մեջ․ Հրանտ Բագրատյան

Պեկինում Ադրբեջանը 800 մլն դոլարի հուշագրեր է ստորագրել ինչպես բուն ֆորումի ընթացքում, այնպես էլ երկկողմ ադրբեջանա-չինական տնտեսական ու ռազմական համագործակցության ոլորտում, իսկ Հայաստանի վարչապետը պետք է կարողանա մեր երկիրը որեւէ տարբերակով խցկել Մետաքսի ճանապարհի ծրագրերի մեջ։ Այս մասին ֆեյսբուքյան գրառում է արել ՀՀ նախկին վարչապետ Հրանտ Բագրատյանը՝ անդրադառնալով Պեկինի միջազգային համաժողովի արդյունքներին եւ Հայաստանի հնարավոր քայլերին։ «Պեկինում ավարտվեց մետաքսի ճանապարհի 2-րդ ֆորումը։ Ահագին փող բաժանվեց։ ՌԴ-ն օգտվում է առիթից և փորձում է Տրանսսիբն ու ԲԱՄ-ը դարձնել արագընթաց երկաթգիծ Չինաստանի ու ԵՄ միջև (կներդրվի մինչև 2 տասնյակ մլրդ դուլար), Ղազախստանն ուզում է նույն բանը բայց իր տարածքով անցնող գծերով, Վրաստանը կառուցում է Անակլիա նավահանգիստը, Ուկրաինան 345 մլն դոլար է վերցնում Կրեմենչուգի կամուրջի համար, Ադրբեջանը 800 մլն դոլարի հուշագրեր է ստորագրել ինչպես բուն ֆորումի, այնպես էլ երկկողմ ադբրբեջանա-չինական տնտեսական ու ռազմական համագործակցության ոլորտում։ Ի դեպ, սրա հետ կապված, չինական կողմը որպես քաղաքավարության նշան, բալանս պահելու համար, Հայաստանի վարչապետին կհրավիրի Չինաստան։ Վերջինս պետք է կարողանա մեր երկիրը որևէ տարբերակով խցկել Մետաքսի ճանապարհի ծրագրերի մեջ»,- ասված է նրա գրառման մեջ։