ԶՈՒ գեներալի դեպքում դավաճանություն կհամարեի. Տոնոյանի` Միհրան Պողոսյանի` ՌԴ-ից քաղապաստան հայցելու մասին
«Որպես պաշտպանության նախարար՝ եկեք ես ԶՈւ գեներալների համար պատասխան տամ: Եթե չեմ սխալվում, Միհրան Պողոսյանը ԴԱՀԿ ծառայության գեներալ է եղել»: Այս մասին ԱԱԾ սահմանապահ զորքերի վարչությունում լրագրողների հետ զրույցում ասաց պաշտպանության նախարար Դավիթ Տոնոյանը՝ անդրադառնալով ԴԱՀԿ նախկին պետ Միհրան Պողոսյանի՝ ՌԴ-ից քաղաքական ապաստան խնդրելու հարցին: Նախարարը հավելեց, որ ինքը հստակ տեղեկություն չունի, որ ԴԱՀԿ նախկին պետ Միհրան Պողոսյանը ՌԴ-ից ապաստան է խնդրել:
Հարցին՝ եթե ԶՈւ գեներալները նման քայլի դիմեին, ինչպես կդիտվեր դա՝ Տոնոյանն ասաց. «Որպես դավաճանություն»:
Իսկ ինչ կասի Մարտի մեկի գործով մեղադրյալ, պաշտպանության նախկին նախար Միքայել Հարությունյանի մասով. չնայած նա ՌԴ-ից ապաստան չի խնդրել, բայց իրեն չեն արտահանձնում՝ պարզվեց, որ ՌԴ քաղաքացի է: Դավիթ Տոնոյանը պատասխանեց. «Երկրորդ քաղաքացիություն ունենալը սահմանափակված չէ օրենսդրությամբ, դուք ինձ տանում ենք բարոյական դաշտ, ես ունեմ իմ վարքի կանոնները»:
Հարցին՝ նորմա՞լ է համարում անվտանգության տեսանկյունից, որ պաշտպանության նախարարը լինի երկքաղաքացի, Տոնոյանն ասաց. «Ես ՝ որպես Դավիթ Տոնոյան, դա նորմալ չեմ համարում, բայց օրենքով կարող է լինել»:
