Այլևս ապօրինի երաշխիքներ չկան, երաշխիքները բոլորի համար հավասար են. Ն. Փաշինյան
«Իմ քայլը» հանուն Լոռու մարզի» ներդրումային բիզնես ծրագրի շրջանակներում Լոռիում անցկացվող բիզնես-ֆորումին ներկա է նաև ՀՀ վարչապետ Նիկոլ Փաշինյանը, որը, ելույթ ունենալով, խոսել է քաղաքական հեղափոխությունից տնտեսական հեղափոխություն անցում կատարելու մարտավարության մասին:
Նա հարց է առաջ քաշել, թե արդյոք հայ ժողովուրդը կարող է հասնել մի էֆեկտի, որը միջազգայնորեն ընդունված է համարել տնտեսական հրաշք.
«Այն ժողովուրդը, որ ի վիճակի է եղել հասնել մի էֆեկտի, որը կարող ենք համարել քաղաքական հրաշք, ուրեմն տնտեսական հրաշքը ևս մեր հասանելիության տիրույթում է, մենք պետք է հասկանանք»:
Իսկ տնտեսական հեղափոխության պարամետրերը, ըստ նրա, նոր աշխատատեղերն են, եկամուտների ու բարեկեցության նոր մակարդակը, իսկ արդյունքը պետք է լինի բարեկեցության նոր և բարձր մակարդակը: Նա ընդգծել է, որ տնտեսական հեղափոխության մեթոդաբանությունը չի տարբերվում քաղաքական հեղափոխության մեթոդաբանությունից: Յուրաքանչյուր քաղաքացի այս դեպքում էլ պետք է որոշում կայացնի մաս կազմել այդ հեղափոխության:
Խոսելով եղանակների մասին՝ հայտարարել է, որ այլևս ապօրինի երաշխիքներ չեն լինելու այս ճանապարհին: Նա հույս է հայտնել, որ համաժողովի մասնակիցները գիտակցում են իրենցից յուրաքանչյուրի պատասխանատվությունն այս գործում:
