Telegram-ի միջոցով 10 կգ մարիխուանա ձեռք բերելու մեջ մեղադրվող երկու անձ կալանավորվել է

ՀՀ քննչական կոմիտեն հայտնել է, որ նախաքննության ընթացքում ձեռք բերված տվյալների համաձայն՝ երկու անձ՝ Ս.Պ.-ն և Հ.Պ.-ն, Telegram-ի միջոցով թմրամիջոցների առուվաճառքով զբաղվող օգտատիրոջ ցուցումով մեկնել են նշված վայր և թաքստոցից վերցրել շուրջ 10 կգ «մարիխուանա» տեսակի թմրամիջոց։

Ըստ ՔԿ-ի՝ նրանք չեն հասցրել ավարտին հասցնել ենթադրյալ հանցագործությունը, քանի որ ձերբակալվել են ՀՀ ԱԱԾ աշխատակիցների կողմից։

Նախաքննության ընթացքում Ս.Պ.-ի բնակարանում կատարված խուզարկությամբ հայտնաբերվել են իրացնելու նպատակով պահվող «մարիխուանա» տեսակի թմրամիջոց, էլեկտրոնային կշեռքներ, ինքնասոսնձվող ժապավեններ և պոլիէթիլենային փաթեթներ, որոնք առգրավվել են։

ՔԿ-ի հաղորդմամբ՝ Ս.Պ.-ին մեղադրանք է առաջադրվել առանձնապես խոշոր չափերով թմրամիջոցների ապօրինի շրջանառության կամ իրացման փորձի, ինչպես նաև թմրամիջոցների ապօրինի շրջանառության նպատակով պահելու հոդվածներով, իսկ Հ.Պ.-ին՝ առանձնապես խոշոր չափերով թմրամիջոցների ապօրինի շրջանառության կամ իրացման փորձի համար։

Նրանց նկատմամբ որպես խափանման միջոց կիրառվել է կալանքը։ Քրեական վարույթը մեղադրական եզրակացությամբ ուղարկվել է հսկող դատախազին՝ այն հաստատելու և դատարան ուղարկելու միջնորդությամբ։

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։