10:00 Լուրերը մեկ տողով. Անհետացած երեխայից ու 8 տոննա առգրավված ապրանքից մինչև անգլիական երաշտ

Անցած ժամվա լուրերը՝ հակիրճ և բովանդակային.

•ՈՐՈՆՎՈՒՄ Է ԱՆՀԵՏ ԿՈՐԱԾ ԵՐԵԽԱ. Համայնքային ոստիկանության Նոր Նորքի բաժնի կողմից որպես անհետ կորած որոնվում է հուլիսի 29-ին տնից դուրս եկած 14-ամյա Վահե Ապիկյանը։

•ԱՊՕՐԻՆԻ ԱՌԵՎՏՐԻ ԿԱՆԽՈՒՄ. Երևանի քաղաքապետարանի ստուգումների արդյունքում Մալաթիա-Սեբաստիայում չնախատեսված վայրերում առևտուր անելու համար կազմվել են արձանագրություններ և առգրավվել է 8 տոննա ապրանք։

•ԱԹՍ ՀԱՐՎԱԾՆԵՐԻՑ ՊԱՇՏՊԱՆՎԵԼՈՒ ՓՈՐՁ. Ռուսաստանում Ozon ընկերության լոգիստիկ կենտրոնի տանիքին արված «Սա Wildberries-ը չէ» գրությունը կապում են անօդաչու թռչող սարքերի հաճախացած հարվածների հետ։

•ԴԱՏԱՎՃԻՌ ԲԱՔՎՈՒՄ. Ադրբեջանում չորս քաղաքացիներ դատապարտվել են ազատազրկման՝ Խորհրդային Միության դրոշներով չարտոնված երթ կազմակերպելու փորձի և կոմունիստական քարոզչության համար։

•ԷՐԴՈՂԱՆԻ ՔՆՆԱԴԱՏՈՒԹՅՈՒՆԸ. Թուրքիայի նախագահը հայտարարել է, որ Իսրայելի ագրեսիվ գործողությունների և տարածքների օկուպացիայի հետևանքների գինը վճարում է Մերձավոր Արևելքի ողջ տարածաշրջանը։

•ԻՍՐԱՅԵԼԻ ԵՎ ԱՄՆ-Ի ՔՆՆԱՐԿՈՒՄՆԵՐԸ. Բենիամին Նեթանյահուն Դոնալդ Թրամփի հետ բանակցություններում նշել է, որ Իսրայելը սեփական նախաձեռնությամբ չի հարվածի Իրանին՝ առանց Վաշինգտոնի խնդրանքի։

•ԵՐԱՇՏ ԱՆԳԼԻԱՅՈՒՄ. Ամառային չորրորդ տաք ալիքի և տեղումների պակասի պատճառով Անգլիայի մի շարք շրջաններում հայտարարվել է երաշտ, ինչը հանգեցրել է ջրի օգտագործման սահմանափակումների։