Նրան շատ լավ էին փակել, բայց նա գտավ լուծումը․ Թրամփը զարմացել է Մեսիի խաղից

ԱՄՆ նախագահ Դոնալդ Թրամփը անդրադարձել է Լիոնել Մեսիի խաղին՝ խոսելով 2026 թվականի աշխարհի առաջնության կիսաեզրափակիչում Արգենտինայի հավաքականի՝ Անգլիայի նկատմամբ կատարած տպավորիչ հաղթանակի  մասին։

Արգենտինա-Անգլիա հանդիպումը երկար ժամանակ ընթանում էր անգլիացիների առավելությամբ։ Սակայն խաղի վերջնամասում գործող չեմպիոն Արգենտինան փոխեց հանդիպման ընթացքը։ Լիոնել Մեսին դարձավ թիմի գլխավոր դերակատարներից մեկը՝ կատարելով երկու գոլային փոխանցում և օգնելով իր թիմին դուրս գալ եզրափակիչ։

Արգենտինայի հաղթանակից հետո մի շարք մասնագետներ սկսել էին վերլուծել խաղը։ Նրանց թվում էր նաև ԱՄՆ նախագահ Դոնալդ Թրամփը, որը հայտարարել է, թե Մեսիի խաղում նկատել է մի դետալ, որի մասին շատերը չեն խոսել։

Նյու Յորքում կայացած միջոցառման ժամանակ Թրամփը պատմել է Մեսիի՝ Անգլիայի դեմ կատարած փոխանցման մասին։

«Ես դիտեցի այն փոխանցումը, որը կատարեց Մեսին։ Ես այնքան լավ չեմ հասկանում ֆուտբոլից, որքան այստեղ գտնվող որոշ մարդիկ, բայց ես գիտեմ սպորտը։ Ես նկատեցի, որ Մեսին շատ լավ էր փակված։ Եվ հանկարծ նա հայտնվեց աջ կողմում»,- ասել է Թրամփը։

Նա հավելել է, որ Մեսին կարողացել է ազատ տարածք գտնել, իսկ մրցակից ֆուտբոլիստը այլևս չէր կարողացել արդյունավետ խանգարել նրան։

«Ոչ ոք դրա մասին չէր խոսում, բայց ես նկատեցի։ Նա շատ լավ էր վերահսկվում հիանալի ֆուտբոլիստի կողմից, հետո տեղափոխվեց աջ եզր, և մյուս խաղացողը պարզապես կանգնած էր։ Նա բավական ժամանակ ուներ։ Հարվածը գրեթե կատարյալ էր։ Դա հիանալի էր»,- նշել է ԱՄՆ նախագահը։

Ֆուտբոլային վերլուծաբանները նշում են, որ Մեսիի՝ խաղի վճռական պահերին աջ եզրում հայտնվելը Արգենտինայի այս առաջնության ընթացքում հաճախ կիրառվող տակտիկական լուծումներից մեկն է։

Միաժամանակ, Թրամփը շարունակում է մնալ ԱԱ-2026-ի շուրջ ամենաքննարկվող դեմքերից մեկը։ Նա մինչև մրցաշարի եզրափակիչը չէր ներկա գտնվել ԱՄՆ-ում, Կանադայում և Մեքսիկայում անցկացված առաջին 102 հանդիպումներին, սակայն եզրափակչից առաջ ակտիվորեն մասնակցում է միջոցառումներին։

Ուրբաթ օրը Թրամփը մամուլի ասուլիս էր անցկացրել՝ Աշխարհի առաջնության գավաթի կողքին։ Նրա ելույթը ներառում էր ոչ միայն ֆուտբոլային թեմաներ, այլև այլ հարցերի անդրադարձեր։

Ասուլիսին ներկա էր նաև ՖԻՖԱ-ի նախագահ Ջաննի Ինֆանտինոն, որը 2026 թվականի աշխարհի առաջնությունը անվանել էր «մարդկության պատմության ամենամեծ սոցիալական և մշակութային իրադարձություններից մեկը»։

Աշխարհի առաջնության եզրափակիչում Արգենտինան կհանդիպի Իսպանիայի հավաքականին։