Մեսին անդրադարձել է Յամալի հետ 2007 թվականի հայտնի լուսանկարին

Արգենտինայի հավաքականի ավագ Լիոնել Մեսին արձագանքել է իր և Իսպանիայի ֆուտբոլիստ Լամին Յամալի՝ 2007 թվականին արված հայտնի լուսանկարին։

Լուսանկարում 20-ամյա Մեսին լողացնում է այն ժամանակ 6 ամսական Յամալին։ Այն արվել է «Բարսելոնայի» մարզադաշտում՝ բարեգործական օրացույցի շրջանակում։

«Այդ լուսանկարն անհավանական է։ Ես նրա հետ լուսանկարվել եմ, երբ նա դեռ փոքր երեխա էր։ Այն, որ հիմա մենք երկուսս էլ աշխարհի առաջնությունում ենք խաղում, խելահեղ է»,- ասել է Մեսին։

39-ամյա Մեսին և 19-ամյա Յամալը առաջին անգամ կբախվեն միմյանց ազգային հավաքականների մակարդակով՝ 2026 թվականի աշխարհի առաջնության եզրափակիչում։

Արգենտինացի ֆուտբոլիստը նշել է, որ Յամալը ներկայում աշխարհի լավագույն խաղացողներից մեկն է։

«Նա հիանալի ֆուտբոլիստ է, համաշխարհային աստղ։ Նա ընդամենը 19 տարեկան է, և նրան դեռ երկար ճանապարհ է սպասվում։ Մաղթում եմ նրան լավագույնը, բայց մենք ամեն ինչ կանենք, որպեսզի այս անգամ նա չեմպիոն չդառնա»,- ասել է Մեսին։

Լուսանկարի հեղինակ լուսանկարիչ Ժոան Մոնֆորտը նշել է, որ կադրն ամբողջ աշխարհում մեծ տարածում է ստացել։

«Լուսանկարը պայթեցրեց համացանցը, իսկ այն փաստը, որ եզրափակիչը ԱՄՆ-ում է անցկացվում, ավելի մեծ ուշադրություն տվեց դրան։ Հիմա ամեն ինչ ավարտվում է Մեսիի և Յամալի եզրափակիչով։ Սա ավելի լավ է, քան ցանկացած ֆիլմի սցենար»,- ասել է նա։

ԱԱ-2026-ի եզրափակիչում Իսպանիան և Արգենտինան կհանդիպեն հուլիսի 19-ին։