Կրակահերթ Երևանում․ սպանություն՝ Մուրացան փողոցում

Այսօր՝ հուլիսի 18-ին, Մուրացան 109 հասցեում գրանցված միջադեպի և դրա հետևանքով հնչած կրակոցների ու զոհի վերաբերյալ միաժամանակ օպերատիվ տեղեկություններ են ստացվել ՀՀ Ներքին գործերի նախարարության ոստիկանության քրեական ոստիկանության գլխավոր վարչությունում և Երևանի քրեական վարչությունում։ Երևանի 103 շտապօգնության բժիշկների հերթապահ խումբը տեղում արձանագրել է քաղաքացու մահը, հայտնում է Shamshyan. com-ը

Դեպքի վայր են ժամանել քրեական ոստիկանության գլխավոր վարչության Երևանի քրեական վարչության բազմաթիվ ծառայողներ՝ վարչության պետ Հայկ Հարությունյանի առաջնորդությամբ: Այստեղ են գտնվել նաև ՀՀ ՆԳՆ ոստիկանության Պարեկային ծառայության Երևան քաղաքի գնդի 4-րդ գումարտակի պարեկները՝ գնդի հրամանատար Անդրանիկ Խաչատրյանի և գումարտակի հրամանատար Դավիթ Նիկողոսյանի գլխավորությամբ, ինչպես նաև ՀՀ ՆԳՆ ոստիկանության համայնքային ոստիկանության գլխավոր վարչության Էրեբունու բաժնի օպերատիվ խումբը՝ բաժնի պետի տեղակալ Վլադ Բազունցի գլխավորությամբ։

Ոստիկանության Էրեբունու բաժնից տեղեկատվությունը փոխանցվել է ՀՀ Քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժին։ Տեղում աշխատել է քննչական խումբը՝ բաժնի պետ Ռոման Մախմուդյանի և օրվա հերթապահ պատասխանատու քննիչի գլխավորությամբ։

Փաստի առթիվ քննչական բաժնում «սպանություն» հատկանիշներով նախաձեռնվել է քրեական վարույթ, որի շրջանակներում պարզվում են դեպքի հանգամանքները, սպանվածի ու մյուս մասնակիցների ինքնությունը։ Իրականացվում են համատեղ քննչական և օպերատիվ-հետախուզական գործողություններ՝ հանցագործությունը կատարած անձի կամ անձանց ինքնությունը պարզելու, ինչպես նաև հանցագործության գործիք հանդիսացող հրազենը գտնելու նպատակով։

Տեղում հայտնաբերվել են կրակված պարկուճներ, արնանման հետքեր, ինչպես նաև «Mercedes G» մակնիշի և մի քանի այլ մեքենաներ, որոնց վրա առկա են կրակոցների հետքեր: