Սպիտակ տունը սպառնացել է Իրանին հարվածներով` ցանկացած ժամանակ և ցանկացած վայրում

Սպիտակ տան մամուլի քարտուղար Քերոլայն Լևիթը հայտարարել է, որ ԱՄՆ զինված ուժերը ցանկացած պահի և ցանկացած վայրում կարող են հարված հասցնել Իրանին, քանի որ, նրա խոսքով, Թեհրանի պաշտպանական հնարավորությունները գրեթե ամբողջությամբ չեզոքացված են։

Լևիթը ճեպազրույցի ընթացքում նշել է, որ Իրանի ներկայիս խոցելի վիճակը Դոնալդ Թրամփի վարչակազմի քաղաքականության և մասնավորապես «Էպիկական կատաղություն» (Operation Epic Rage) ռազմական գործողության արդյունքն է։ Նրա խոսքով՝ ստեղծված իրավիճակը ներկայիս նախագահի վարած քաղաքականության անմիջական հետևանքն է։

Այս հայտարարությունը հնչել է ԱՄՆ-ի և Իրանի միջև շարունակվող լարվածության ֆոնին։ Հիշեցնենք, որ հունիսի 18-ի գիշերը Թեհրանն ու Վաշինգտոնը ստորագրել էին հակամարտության ավարտի մասին հուշագիր, որը վերաբերում էր փետրվարի 28-ից սկսված բախումներին։ Սակայն հուլիսի 8-ից ԱՄՆ զինված ուժերը մի շարք հարվածներ են հասցրել Իրանի տարածքին՝ դրանք ներկայացնելով որպես պատասխան Հորմուզի նեղուցում առևտրային նավերի դեմ ենթադրյալ իրանական հարձակումներին։

Իր հերթին Իրանը պատասխան հարվածներ է հասցրել Մերձավոր Արևելքի մի շարք երկրներում տեղակայված ամերիկյան ռազմաբազաներին՝ մեղադրելով Վաշինգտոնին հրադադարի պայմանավորվածությունը խախտելու մեջ։ Իսկ հուլիսի 9-ին ԱՄՆ նախագահ Դոնալդ Թրամփը հայտարարել է հրադադարի ռեժիմի դադարեցման մասին։