ԻՀՊԿ-ն հայտարարել է Օմանում, Բահրեյնում, Քուվեյթում և Սիրիայում ամերիկյան օբյեկտների վրա հարվածների մասին

Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ հարվածներ է հասցրել Օմանում տեղակայված ԱՄՆ-ի օդային և ծովային վերահսկողության ռադարներին։

ԻՀՊԿ-ի տարածած հայտարարության համաձայն՝ «գործողությունների 13-րդ ալիքի» շրջանակում թիրախավորվել են Օմանի Գանեմ շրջանի օդային տարածքի վերահսկման ռադարը և Սալամա ժայռերի շրջանում գտնվող ծովային վերահսկման ռադարը։ Իրանական կողմը պնդում է, որ երկու օբյեկտներն էլ ոչնչացվել են։

ԻՀՊԿ-ն նաև հայտարարել է, որ պատասխան գործողությունները շարունակվում են, իսկ Հորմուզի նեղուցը շարունակում է գտնվել Իրանի ռազմածովային ուժերի վերահսկողության ներքո։

Ավելի վաղ Իրանը հայտնել էր նաև Բահրեյնում և Քուվեյթում գտնվող ամերիկյան ռազմական օբյեկտներին հասցված հարվածների մասին։ Իրանական կողմի պնդմամբ՝ Բահրեյնում թիրախավորվել է Սախհիր ավիաբազան, որտեղ տեղակայված են ԱՄՆ բանակի հետախուզական ինքնաթիռներ և ուղղաթիռներ։

ԻՀՊԿ-ն նաև հայտարարել է, որ Սիրիայի Էթ-Թանֆ շրջանում հարվածել է ամերիկյան օպերատիվ կենտրոնին՝ վնասելով ռադարային համակարգ և մի քանի ուղղաթիռ։ Իրանական կողմը պնդում է, որ հարձակման հետևանքով ամերիկացի զինծառայողները զգալի կորուստներ են կրել։

Բացի այդ, ԻՀՊԿ-ն զգուշացրել է, որ եթե ԱՄՆ-ն շարունակի հարվածները, տարածաշրջանից նավթի և գազի արտահանումը չի թույլատրվի։