Մենք չենք վախենում, Ֆրանսիան պետք է վախենա. Յամալ

 Իսպանացի ֆուտբոլիստը վստահություն է հայտնել իր թիմի ուժերի նկատմամբ և ընդգծել նախկինում ունեցած հաջող փորձը։ «Մենք վախ չունենք։ Եթե որևէ մեկը պետք է վախենա, դա Ֆրանսիան է։ Մենք նրանց արդեն մեկ անգամ դուրս ենք թողել պայքարից։ Ակնհայտ է, որ երկու թիմերն էլ համաշխարհային մակարդակի մեծ հավաքականներ են։ Տեսնենք, թե ինչ կլինի»,- Յամալի խոսքերը մեջբերում է The Touchline-ը։ 

Աշխարհի 2026 թվականի առաջնության կիսաեզրափակիչի Ֆրանսիա — Իսպանիա հանդիպումը կկայանա երեքշաբթի՝ հուլիսի 14-ին։ Հիշեցնենք, որ Եվրո-2024-ի կիսաեզրափակիչում Իսպանիայի հավաքականը 2-1 հաշվով հաղթել էր Ֆրանսիային։ Այն ժամանակ իսպանացիները դուրս եկան եզրափակիչ, որտեղ նույն՝ 2-1 հաշվով առավելության հասան Անգլիայի նկատմամբ և նվաճեցին Եվրոպայի չեմպիոնի տիտղոսը։