16:00 Լուրերը մեկ տողով. Նիկոլ Փաշինյանի ելույթը, Armat Media-ի գործը, ընտրակաշառքի բացահայտում

Անցած ժամվա լուրերը՝ հակիրճ և բովանդակային.

·  Նիկոլ Փաշինյանը «Իննոպրոմ»-ում հայտարարել է, որ Հայաստանի արդյունաբերությունն աճում է, իսկ առաջնահերթությունը բարձր տեխնոլոգիաների, արհեստական բանականության և գիտատար արտադրությունների զարգացումն է։ 

·   Armat Media-ի գլխավոր խմբագիրը հայտնել է, որ լրատվամիջոցի 9 աշխատակից հարցաքննվում է որպես վկա և պնդել, որ իրավապահների գործողություններով խաթարվել է խմբագրության աշխատանքը։ 

·  Նաիրի Սարգսյանը հայտարարել է, որ իշխանափոխությունն այլընտրանք չունի և խիստ բացասաբար է գնահատել Գագիկ Ծառուկյանի առանձնատանն ու ընկերություններում իրականացված խուզարկությունները։ 

·   Հակակոռուպցիոն կոմիտեն հայտնել է, որ «Հայաստան» դաշինքի օգտին ընտրակաշառք բաժանելու գործով կան ձերբակալվածներ, իրականացվել են խուզարկություններ և այլ քննչական գործողություններ։ 

·   Վլադիմիր Զելենսկին հայտարարել է, որ ուկրաինական ՀՕՊ-ը չի կարողացել հետ մղել ռուսական բալիստիկ հրթիռների հարվածը, իսկ Ռուսաստանը հայտնել է Կիևի ռազմարդյունաբերական օբյեկտներին հասցված զանգվածային հարվածների մասին։ 

·  Ռուսական ուժերը երկու անգամ հարվածել են Նիկոլաևի մարզում գտնվող SOCAR բենզալցակայանին, իսկ վնասների վերաբերյալ պաշտոնական տվյալներ դեռ չեն հրապարակվել։ 

·   Թուրքիայի ԱԳ նախարար Հաքան Ֆիդանը հայտարարել է, որ Իսրայելը կարող է փորձել խափանել ԱՄՆ-ի և Իրանի միջև ընթացող բանակցային գործընթացը։ 

·   Le Monde-ի տեղեկություններով՝ Սոմալիլենդի Բերբերայում կառուցվում է ԱՄԷ-ի, ԱՄՆ-ի և Իսրայելի շահերին ծառայող ռազմական ենթակառուցվածք, թեև պաշտոնական հաստատում դեռ չկա։