Կվերադառնանք «ջունգլիների աշխարհ»․ Պուտին-Սի Ցզինպին հանդիպումից հետո Չինաստանը կոշտ ուղերձ է հղել աշխարհին

Պեկինի Ժողովրդական ներկայացուցիչների տանը տեղի են ունեցել Չինաստանի Ժողովրդական Հանրապետության նախագահ Սի Ցզինպինի և պաշտոնական այցով Չինաստան ժամանած Ռուսաստանի Դաշնության նախագահ Վլադիմիր Պուտինի առանձնազրույցն ու ընդլայնված կազմով բանակցությունները: Հանդիպման ավարտին երկրների առաջնորդները հանդես են եկել համատեղ հայտարարությամբ, որտեղ ամփոփել են քննարկումների արդյունքները:

Չինաստանի ղեկավարն իր խոսքում ընդգծել է երկկողմ կապերի ընդլայնման և փոխադարձ ռազմավարական երկխոսության շարունակականության կարևորությունը: Նրա ձևակերպմամբ՝ Պեկինն ու Մոսկվան պետք է շարունակեն աջակցել միմյանց առանցքային շահերին վերաբերող հարցերում և համատեղ քայլեր ձեռնարկեն գործընկերության նոր հեռանկարներ ձևավորելու ուղղությամբ։ Սի Ցզինպինը ներկայիս հարաբերությունների մակարդակը բնորոշել է որպես օրինակելի մոդել մեծ պետությունների միջև փոխգործակցության համար:

Անդրադառնալով աշխարհաքաղաքական ներկա զարգացումներին՝ ՉՀՆ նախագահը մտահոգություն է հայտնել միջազգային հարթակում տիրող անկայունության կապակցությամբ: Նա նշել է, որ միակողմանի գործողություններն ու գերիշխանության ձգտումները լուրջ վնաս են հասցնում համաշխարհային կայունությանը՝ ստեղծելով միջազգային իրավունքի կանոններից հեռանալու և անվտանգային ճգնաժամերի խորացման վտանգներ: 

Չինաստանի նախագահը՝ նախազգուշացրել է միջազգային ասպարեզում «ջունգլիների աշխարհ» վերադառնալու սպառնալիքի մասին։

«Այս աշխարհը լիովին անհանգիստ է։ Միակողմանի գործողությունների և գերիշխանության պատճառած վնասն անհավանական է։ Վտանգ է առաջանում ջունգլիների օրենքին վերադառնալու համար», - ասել է նա Ռուսաստանի նախագահ Վլադիմիր Պուտինի հետ համատեղ հայտարարության ժամանակ։