Հայաստանը` Ռուսաստանի քաղաքացիների համար վտանգավոր երկրների ցուցակում. ՌԴ ԱԳՆ-ն զգուշացնում է

Ռուսաստանի ԱԳՆ ներկայացուցիչ Գրիգորի Լուկյանցևը հայտնել է, որ արտերկիր մեկնող ՌԴ քաղաքացիները պետք է հաշվի առնեն երրորդ երկրներում կալանավորվելու և ԱՄՆ-ին արտահանձնվելու վտանգը։

«Ռիա Նովոստի»-ի հետ զրույցում ՌԴ ԱԳՆ մարդու իրավունքների բազմակողմ համագործակցության վարչության տնօրենն ընդգծել է, որ բազմաթիվ պետություններ, այդ թվում՝ ԵՄ անդամները, ունեն արտահանձնման որոշակի պարտավորություններ։ Ըստ Լուկյանցևի՝ այս հանգամանքները պետք է դիտարկել ճամփորդության ռիսկերը գնահատելիս։ Նա հավելել է, որ նախարարությունը չի սահմանափակում քաղաքացիների տեղաշարժը, այլ միայն խորհուրդ է տալիս զերծ մնալ որոշակի երկրներ այցելելուց, եթե անձինք ենթադրում են, որ կարող են խնդիրներ ունենալ եվրոպական կամ ամերիկյան իրավապահների հետ։

Ռուսաստանի արտաքին քաղաքական գերատեսչության տվյալներով՝ ԱՄՆ-ի պահանջով ՌԴ քաղաքացիների ձերբակալման բարձր հավանականություն ունեցող երկրների ցանկում են Եվրոպայի ու Լատինական Ամերիկայի երկրների մեծ մասը, Կանադան, Ավստրալիան, Հայաստանը, Իսրայելը, Հարավային Կորեան, Մալդիվները, Սինգապուրը, Թաիլանդը, Շրի Լանկան, Ֆիջին, Մարոկկոն և Լիբերիան։ Նախարարությունը միաժամանակ շեշտում է, որ այս ցանկը սպառիչ չէ և չի ներառում բոլոր այն պետությունները, որոնք Միացյալ Նահանգների հետ ունեն արտահանձնման պայմանագրեր։