Չինաստանի ԱԳՆ՝ Ռուսաստանի վերաբերյալ հայտարարությամբ է հանդես եկել

Չինաստանի արտաքին գործերի նախարարությունը հանդես է եկել պաշտոնական հայտարարությամբ՝ վերահաստատելով Մոսկվայի հետ համակողմանի ռազմավարական գործընկերությունը շարունակելու մտադրությունը։ Պեկինում կայացած ճեպազրույցի ժամանակ դիվանագիտական գերատեսչության ներկայացուցիչ Գո Ցզյակունը նշել է, որ չինական կողմը պատրաստ է հետևողականորեն զարգացնել բարիդրացիական կապերը և ամրապնդել փոխգործակցությունը բոլոր ոլորտներում։

Ըստ չինական կողմի՝ երկու պետությունների հարաբերությունները ներկայում հանդիսանում են կայունացնող գործոն համաշխարհային բարդ իրավիճակում։ Պեկինում կարևորում են գլոբալ կառավարման ավելի արդար համակարգի ձևավորումը, ինչին պետք է նպաստի Ռուսաստանի և Չինաստանի միջև առկա սերտ երկխոսությունը։ Այս դիրքորոշումը հաջորդել է ՌԴ նախագահ Վլադիմիր Պուտինի՝ մայիսի 9-ին արված հայտարարությանը, որտեղ նա երկու երկրների համագործակցությունը բնութագրել էր որպես միջազգային հարաբերությունների կայունության առանցքային գործոն։

Հատկանշական է, որ այս տարի լրանում է երկու երկրների միջև ռազմավարական գործընկերության հաստատման 30-ամյակը և Բարիդրացիության ու բարեկամության պայմանագրի ստորագրման 25-ամյակը։ Դիվանագետի խոսքով՝ հարաբերությունների զարգացման նոր պատմական հնարավորություններ են ստեղծում նաև 2026-2027 թվականներին նախատեսված կրթական ոլորտի փոխանակման տարիները։ Գործընթացը շարունակում է մնալ երկու երկրների առաջնորդների անմիջական ուշադրության կենտրոնում։