ՏԵՍԱՆՅՈՒԹ. Վեդիի աղմկահարույց գործում 3 անձ է ներգրավված. Փաստաբան

Վեդի քաղաքում դեռահաս քույրերի նկատմամբ սեռական բռնության դեպքի վերաբերյալ քույրերի փաստաբան Վարդուհի Էլբակյանը հայտարարեց, որ հաղորդումներ են ներկայացրել դպրոցի տնօրենը, հոգեբանն ու հավաքարարը, ովքեր ականատես են եղել երեխաների նկատմամբ կիրառվող բռնությանը։


Ըստ փաստաբանի՝ ականատեսները տեսել են, թե ինչպես են տարբեր անձինք երեխաներին ուժով նստեցրել մեքենաներ։ Էլբակյանը նշեց, որ դեպքին ներգրավված է երեք անձ, սակայն բացահայտումն ու տեղեկությունների հավաքագրումը չորս օրվա ընթացքում իրականացվել է իրենց, այլ ոչ թե քննչական մարմինների կողմից։ Հավաքված տվյալները փոխանցվել են Վեդու քննչականին։


Փաստաբանը պարզաբանեց, որ 15-ամյա աղջկա նկատմամբ սեքսուալ բնույթի գործողությունների փաստով քրեական վարույթը հարուցվել է դեռևս այս տարվա փետրվարի 12-ին, սակայն մինչ օրս չկա որևէ ձերբակալված անձ կամ մեղադրյալ։ Ըստ նրա՝ պատկան մարմինների անգործությունն ու հովանավորչությունը հանգեցրել են հաջորդող հանցագործություններին, որոնք կրկնվել են արդեն 17 տարեկան անչափահասի նկատմամբ։

Էլբակյանը հայտնեց, որ տեսնելով պետական պաշտպանության բացակայությունը՝ երեխաների հորեղբայրը փորձել է ինքնադատաստան տեսնել և մարմնական միջին ծանրության վնասվածք է հասցրել ենթադրյալ հանցագործներից մեկին՝ Դավիթ Այնազյանին։