Հանրային քրեական հետապնդում` շան նկատմամբ դաժան վերաբերմունքի համար

Բյուրեղավանում շան նկատմամբ դաժան վերաբերմունքի համար բերման ենթարկված անձի նկատմամբ հարուցվել է հանրային քրեական հետապնդում: Այս մասին Radar Armenia-ին հայտնել են Քննչական կոմիտեից։

Քրվարույթը հարուցվել է 307-րդ հոդվածի առաջին մասով (Կենդանիների նկատմամբ դաժան վերաբերմունքը, պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով)։

Հիշեցնենք` համացանցում տարածվել էր տեսանյութ, որտեղ երևում է, թե ինչպես է ավտոմեքենայի վարորդը շանը կապել մեքենայից և քարշ տվել։