ՀՀ–ում ԵՄ դիտորդական առաքելությունը գրել, ապա ջնջել է «Ցեղասպանություն» բառը

Հայաստանում ԵՄ–ի դիտորդական առաքելությունն X-ի իր էջում խմբագրել է Հայոց ցեղասպանության 110-րդ տարելիցի վերաբերյալ գրառումը, որը «Ցեղասպանություն» բառն էր պարունակում։ Այնուհետև տեղադրվել է նոր գրառում, որտեղ բացակայում է «Ցեղասպանություն» եզրույթը, իսկ փոխարենը նշվում է, որ առաքելությունը հարգանքի տուրք է մատուցել 1915-23 թվականների հայ զոհերի հիշատակին։

«Այս օրը հիշեցում է, որ մենք պետք է ամեն ինչ անենք, որպեսզի նման վայրագությունները չկրկնվեն»,– նշվում է գրառման երկրորդ հատվածում, որը նույնն է երկու հրապարակումներում։

Նշենք, որ Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը, ԱՄՆ–ն։