Թրամփը երկարաձգել է ՌԴ–ի դեմ պատժամիջոցների ժամկետը
ԱՄՆ նախագահ Դոնալդ Թրամփը որոշել է մեկ տարով երկարաձգել արտակարգ դրությունը, որը ներառում է մի շարք պատժամիջոցներ Ռուսաստանի դեմ, ասվում է ԱՄՆ Դաշնային ռեգիստրին ներկայացված Սպիտակ տան փաստաթղթում։
«Ես մեկ տարով երկարաձգում եմ 13660 գործադիր հրամանով սահմանված Ազգային արտակարգ դրության հայտարարումը»,- գրել է Թրամփը։
Այս ռեժիմը նախատեսում է մի շարք հակառուսական պատժամիջոցների երկարաձգում, որոնք սահմանվել են ԱՄՆ նախագահների հրամանագրերով 2014, 2018 և 2022 թվականներին։
Ուկրաինական իրադարձությունների հետ կապված արտակարգ դրության մասին հրամանը ԱՄՆ-ում մտցվել է դեռ 2014թ. Այնուհետև ԱՄՆ նախագահ Բարաք Օբամայի 13660 գործադիր հրամանով, որը հրապարակվել է 2014 թվականի մարտի 6-ին, առաջարկվում էր սառեցնել «Ուկրաինայում իրավիճակի զարգացման մեջ ներգրավված մի շարք անձանց» ունեցվածքը։ Ի սկզբանե քննարկվել է նրանց մասին, ովքեր նպաստել են Ղրիմի միացմանը Ռուսաստանի Դաշնությանը։ Հետո արդեն Թրամփի առաջին նախագահության և Ջո Բայդենի նախագահության տարիներին այս ռեժիմի շրջանակներում նման պատժամիջոցների ցանկը մի քանի անգամ ընդլայնվեց։
