ՀՀԿ-ն Ադրբեջանի թելադրանքով իրականացվող գործընթացներին չի մասնակցում. Մամիջանյան

Գործադիր իշխանության ներկայացուցիչները, թե՛ տիկին Արփինե Սարգսյանը և թե՛ տիկին Սրբուհի Գալյանը իմ հարցերի մեծ մասին չեն պատասխանել։ Այս մասին այսօր՝ լրագրողների հետ զրույցում նշեց ԱԺ «Պատիվ ունեմ» խմբակցության ղեկավար Հայկ Մամիջանյանը:

«Տիկին Գալյանը չպատասխանեց իմ նշած խնդիրներին՝ քաղբանտարկյալների վերաբերյալ, Արմեն Աշոտյանից, Մլյանից, քաղաքապետներից, Նարեկ Սամսոնյանից, Վազգեն Սահաթելյանից, Էդգար Ղազարյանից և մնացածից, իսկ տիկին Սարգսյանի պատասխանը, որ ընթանում է քննություն, քննությունը կարող է ընթանալ տարիներ: Ես չեմ կարծում, որ խաղաղ ցուցարարների նկատմամբ բիրտ ուժի կիրառումը կարող է տարիներ շարունակ չբացահայտված մնալ:

Սրանք խնդիրներ են, որոնք պիտի բարձրաձայնվեն, կապ չունի, թե որ ֆորմատում: Դա ցանկացած ընդդիմադիր պատգամավորի պարտքն է իր ընտրողների և Հայաստանի Հանրապետության քաղաքացիների առջև»,-ասել է նա:

Անդրադառնալով նրան, որ արդարադատության նախարար Գալյանն իրենց առաջարկել է միանալ Սահմանադրության բարեփոխումների քննարկումներին, Մամիջանյանն ասել է, որ ՀՀԿ-ն կեղծ, հորինված, իսկ որոշ դեպքերում Ադրբեջանի թելադրանքով իրականացվող գործընթացներին չի մասնակցում։