Իսրայելական բանակը պատրաստ է ցանկացած պահի վերսկսել ինտենսիվ մարտերը
Իսրայելական բանակը պատրաստ է ցանկացած պահի վերսկսել ինտենսիվ մարտերը Գազայի հատվածում, դրա օպերատիվ պլաններն արդեն պատրաստ են, իսկ վերջնական նպատակը պաղեստինյան արմատական ՀԱՄԱՍ շարժման պարտությունն է։ Այս մասին հայտարարել է Իսրայելի վարչապետ Բենիամին Նեթանյահուն՝ ելույթ ունենալով սպայական դասընթացների շրջանավարտների ներկայությամբ։
«Մենք պատրաստ ենք ցանկացած պահի վերադառնալ ինտենսիվ մարտական գործողությունների, արդեն մշակված են օպերատիվ պլաններ»,- ասել է նա։
Նեթանյահուն ընդգծել է, որ Գազայում գործողության հիմնական նպատակները մնում են անփոփոխ՝ այնտեղ պահվող յուրաքանչյուր պատանդի վերադարձ և ՀԱՄԱՍ-ի լիակատար պարտություն։
«Հաղթանակ, հաղթանակ և միայն հաղթանակ»,- ասել է Իսրայելի վարչապետը՝ նշելով, որ դրան «կարելի է հասնել բանակցությունների միջոցով, բայց կարելի է հասնել նաև այլ ճանապարհներով»։
