«Հեզբոլլահը» հայտարարել է Իսրայելի ռազմաբազաների վրա հարձակման մասին
Այսօր առավոտից լիբանանյան «Հեզբոլլահ» շարժման մարտիկները մոտ 20 ռազմական գործողություններ են իրականացրել իսրայելական բանակի դեմ, իսկ լիբանանյան դիմադրությունը հրթիռներով հարձակվել է Աշդոդի և Հայֆայի ռազմակայանների վրա:
«Իսլամական դիմադրության մարտիկները յոթ անգամ (24 ժամվա ընթացքում) թնդանոթային հրետանիով հարվածներ են հասցրել իսրայելական զինվորականների խմբերին Խիյամ գյուղի տարածքում և առաջին անգամ հրթիռներ են արձակել իսրայելական Հաթզոր ավիաբազայի ուղղությամբ, որը գտնվում է Լիբանանի հետ սահմանից 150 կմ հեռավորության վրա՝ Աշդոդ քաղաքից դեպի արևելք»,- ասվում է հայտարարություններից մեկում։
Ըստ տեղեկությունների՝ սահմանային Թել Հարֆա բնակավայրում հարձակման են ենթարկվել մեկ դիվերսիոն և մի քանի իսրայելական տարհանման խմբեր՝ զրահամեքենաների հետ միասին։ Մամուլի ծառայությունը նշում է, որ իսրայելական կողմն ունի չորս զոհ և վեց վիրավոր զինծառայող:
Իսրայելական զինվորականների ևս մի քանի խմբեր հարձակման են ենթարկվել Իսրայելի տարածքում՝ Միտուլա բնակավայրի տարածքում։ Հրթիռների և անօդաչու թռչող սարքերի հարձակման թիրախ է դարձել նաև Ակր քաղաքի Շարագա ռազմաբազան:
Ավելի վաղ հայտնել էինք, որ իսրայելական ինքնաթիռներն իրենց հերթին չորս անգամ հարվածներ են հասցրել Բեյրութի հարավային արվարձաններին և արևելյան Լիբանանի մի քանի բնակավայրերին` Բեքաա հովտում:
