ՏԵՍԱՆՅՈՒԹ․ Ջրհեղեղներ՝ Աֆղանստանում․ զոհերի թիվը գերազանցել է 300-ը

Աֆղանստանի Բաղլան նահանգում ջրհեղեղի հետևանքով զոհերի թիվը գերազանցել է 300-ը: Այս մասին ասվում է ՄԱԿ-ի Պարենի համաշխարհային ծրագրի (ՄԱԿ ՊՀԾ) հաղորդագրության մեջ, որը զետեղված է Х սոցիալական ցանցում:

ՄԱԿ-ի ՊՀԾ-ի տվյալներով՝ վերջին շաբաթներին Բաղլան նահանգում մոլեգնող հորդառատ անձրևների հետևանքով առաջացած ջրհեղեղի զոհ է դարձել ավելի քան 300 մարդ, ավերվել է 1000 տուն:

Կազմակերպությունում նշել են, որ ջրհեղեղից տուժած շրջանների բնակիչների շրջանում օգնություն է բաժանվել:

Մինչդեռ Աֆղանստանի օդերեւութաբանական վարչությունը նախազգուշացրել է Բադախշան, Թահար, Բաղլան, Փանջշեր, Լագման, Կունար, Նուրիստան եւ Նանգարհար նահանգներում հորդառատ անձրեւների մասին:

Հզոր ջրհեղեղներ են նկատվում երկրի տարբեր մասերում և հիմնականում Բաղլան, Գոր, Բադախշան և Հերաթ Նահանգներում: Մտավախություն կա, որ զոհերի թիվը կավելանա։

Ավելի վաղ Աֆղանստանի իշխանությունները հայտնել էին, որ ջրհեղեղից տուժած շրջաններում իրականացվում են շտապ օգնության աշխատանքներ:

Աֆղանստանում ավելորդ տեղումների հետևանքով առաջացած ջրհեղեղները տարեկան հազարավոր մարդկանց կյանքեր են խլում: