Բռնության տեսանյութն ուսումնասիրվելու է ԱԺ ՄԻՊ և հանրային հարցերի հանձնաժողովում
ԱԺ պատգամավոր Ռուստամ Բաքոյանը՝ արձագանքելով երեխայի բռնության տեսարաններով տեսանյութին, հանձնարարել է ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի քարտուղարության փորձագետներին ուսումնասիրել խնդիրը, վերլուծել նման անթույլատրելի երևույթների առաջացման խորքային պատճառները:
Այս մասին պատգամավորը հայտնել է Ֆեյսբուքյան իր էջում՝ հավելելով, որ պատրաստվում է իր լիազորությունների շրջանակներում ձեռնարկել բոլոր միջոցները, կիրառել օրենսդիր մարմնին վերապահված հնարավոր գործիքակազմ՝ մեղավորին պատասխանատվության ենթարկելու ուղղությամբ։
«Հարկ է փաստել, որ նման երևույթը անընդունելի է իրավական պետությունում, ուր պետք է ճանաչվի կոնվենցիոն հայտնի դրույթը առ այն, որ երեխան իր անհատականության լիակատար և բազմակողմանի զարգացման համար պետք է մեծանա ընտանեկան միջավայրում, երջանկության, սիրո և ըմբռնման մթնոլորտում»,-գրել է Բաքոյանը։
Հիշեցնենք, որ համացանցում տեսանյութ էր տարածվել, որտեղ անչափահաս երեխայի նկատմամբ ակնհայտորեն ֆիզիկական, սեռական, մտավոր բռնություն է իրականացվում, ենթադրաբար ընտանիքի անդամների, մասնավորապես` մոր կողմից: Ավելի ուշ ՀՀ ոստիկանությունից հայտնեցին, որ անչափահաս երեխային բռնության ենթարկած կինը հայտնաբերվել է։
