«Վագներ»-ը կներգրավվի Բելառուսի հատուկ ջոկատայինների մարտական պատրաստություններին
Բելառուսի հատուկ նշանակության ստորաբաժանումները և ռուսական «Վագներ» մասնավոր ռազմական ընկերության մարտիկները միասին կաշխատեն մարտական պատրաստության ուղղությամբ։ Այս մասին, Belta-ի փոխանցմամբ, հայտարարել է Բելառուսի ներքին գործերի փոխնախարար, ներքին զորքերի հրամանատար Նիկոլայ Կարպենկովը։
«Այսօր բանակցություններ են ընթանում «Վագներ» ռազմականացված խմբավորման ներկայացուցիչների հետ, որոնք մեզ հետ պետք է զբաղվեն մարտական պատրաստվածությամբ, մեզ փոխանցեն իրենց մարտական փորձը։ Կշարունակեն այստեղ ժամանել «ՍՕԲՐԻ», «Ալմազ» խմբերը»,- ասել է Նիկոլայ Կարպենկովը։
«Մենք կյուրացնենք այն ամենը, ինչ օգտագործվում և կիրառվում է Ուկրաինայում, ինչպես նաև կկիրառենք»,- հավելել է նա։
Բելառուսի նախագահ Ալեքսանդր Լուկաշենկոն ավելի վաղ հայտարարել էր, որ «Վագների» զինյալները «վախենալու ոչինչ չունեն», և որ նրանց մարտական փորձն օգտակար կլինի իրենց զինվորականների համար։
