ՆԱՏՕ-ն հրաժարվել է Ռուսաստանին գործընկեր համարել մինչև «թշնամական քաղաքականության» փոփոխությունը
ՆԱՏՕ-ն չի ձգտում կոնֆլիկտի Ռուսաստանի հետ և նրա համար վտանգ չի ներկայացնում, սակայն Մոսկվան դաշինքի գործընկեր չի համարվի, քանի դեռ «թշնամական քաղաքականությունը» չի փոխվել։ Այս մասին ասված է Վիլնյուսի գագաթնաժողովի կոմյունիկեում։
«Մենք ձգտում ենք կայունության և կանխատեսելիության եվրաատլանտյան տարածաշրջանում և՛ ՆԱՏՕ-ի և՛ Ռուսաստանի միջև: ՆԱՏՕ-ն առճակատման չի ձգտում և վտանգ չի ներկայացնում Ռուսաստանի համար»,- նշվում է փաստաթղթում։
«Նրա թշնամական քաղաքականության և գործողությունների լույսի ներքո մենք չենք կարող Ռուսաստանին համարել մեր գործընկերը։ Մեր հարաբերություններում ցանկացած փոփոխություն կախված է նրանից, թե արդյոք Ռուսաստանը կդադարեցնի իր ագրեսիվ պահվածքը և լիովին կհարգի միջազգային իրավունքի նորմերը»,- ասվում է հայտարարության մեջ։
ՆԱՏՕ-ն հավատարիմ է մնում Մոսկվայի հետ հաղորդակցության ուղիները բաց պահելուն՝ ռիսկերը կառավարելու և մեղմելու, էսկալացիան կանխելու և թափանցիկությունը բարձրացնելու համար՝ միաժամանակ շարունակելով արձագանքել «ռուսական սպառնալիքներին և թշնամական գործողություններին»:
Ռուսաստանը 2021 թվականի նոյեմբերից դադարեցրել է ՆԱՏՕ-ում իր ներկայացուցչության աշխատանքը։
