Կրասնոդարում սպանվել է ՌԴ ՊՆ զորահավաքային վարչության պետի տեղակալը
Կրասնոդարում սպանվել է ՌԴ ՊՆ զորահավաքային աշխատանքների վարչության պետի տեղակալ Ստանիսլավ Ռժիցկին, հայտնում է ТАСС-ը՝ իրավապահ մարմիններին հղումով։ Կրասնոդարի վարչակազմը РБК-ին հաստատել է նրա մահը։
«Իրավապահ մարմինները հետաքննություն են անցկացնում նրա մահվան փաստով», - ասել են լրատվամիջոցին։
Իրավապահ մարմինների ներկայացուցիչները ТАСС-ին հայտնել են, որ «անհայտ անձը մի քանի անգամ կրակել է տղամարդու վրա, ապա փախուստի դիմել»։ Հանցագործության դրդապատճառը և կասկածյալները պարզվում են, հայտնում է աղբյուրը։
Ավելի վաղ SHOT թելեգրամյան ալիքը, հղում անելով լրատվամիջոցներին, հայտնել էր, որ Ռժիցկին սպանվել է առավոտյան վազքի ժամանակ։ Անհայտ անձը չորս անգամ կրակել է նրա վրա, պնդում է ալիքը։
ТАСС-ի փոխանցմամբ՝ Ռժիցկին 2-րդ ռանգի կապիտան էր և «Կրասնոդար» սուզանավի նախկին հրամանատարը։
Լուսանկարում Ստանիսլավ Ռժիցկին է (երկրորդը՝ աջից)։
