«Հայաստանի և Ադրբեջանի միջև խաղաղության պայմանագրից կպարտվեն Ռուսաստանն ու Իրանը». Իսրայելի կապի նախկին նախարար
Իսրայելի կապի նախկին նախարար Այուբ Կարան հոդված է հրապարակել, որում անդրադարձել է Հայաստանի և Ադրբեջանի միջև կնքվելիք խաղաղության պայմանագրին:
«Ադրբեջանի և Հայաստանի միջև խաղաղության պայմանագրի ստորագրման շահառուները կլինեն Իսրայելը, ԱՄՆ-ը, Եվրոպան և Թուրքիան։ Ամենամեծ պարտվողները կլինեն Ռուսաստանն ու Իրանը, որոնք կկորցնեն իրենց ազդեցության գոտիները։
Մոսկվայում վերջին բանակցություններից հետո Կրեմլի համար կարող էր շանս լինել մի փոքր բարելավելու իր իմիջը: Այնուամենայնիվ, խաղաղության համաձայնագրից հետո Իրանի ազդեցությունը Հարավային Կովկասի վրա կվերացվի։ Սա մեծ հաղթանակ կլինի Իսրայելի համար»,- հոդվածում նշել է գործիչը։
Հոդվածում նա շեշտել է, որ Հայաստանը նույնպես շատ բան ունի շահելու խաղաղության համաձայնագրից, մասնավորապես, փոքր, դեպի ծով ելք չունեցող, շրջափակված երկիր լինելու փոխարեն, որը գոյատևելու համար ապավինում է Ռուսաստանի և Իրանի նման միջազգայնորեն մերժված երկրներին, կարող է ծաղկել և բարգավաճել վերականգնված տնտեսությամբ, որը առևտուր է անում Ադրբեջանի և Թուրքիայի հետ: Սա կօգնի Հայաստանի ժողովրդին ոչ միայն ապրել առանց կոնֆլիկտների, այլև վայելել արժանապատիվ տնտեսություն և կենսամակարդակ:
«Իսրայելը կարող է մեծ օգուտ քաղել, երբ խաղաղություն հաստատվի Ադրբեջանի և Հայաստանի միջև: Ականների վտանգը կնվազի, և տարածաշրջանի գյուղատնտեսական ներուժը կբարձրանա: Դա կհանգեցնի ադրբեջանական գյուղատնտեսական արտադրանքի արտահանման զգալի աճի դեպի Իսրայել, իսկ իսրայելական տեխնոլոգիաների արտահանումը Ադրբեջան»- հոդվածում գրել է Այուբ Կարանը:
