Ում առաջարկով է պաշտոնից ազատվել սահմանապահ զորքերի հրամանատարը. Քոչարյանը հայտնում է

ԱԱԾ սահմանապահ զորքերի հրամանատար Արման Մարալչյանին պաշտոնից ազատելու համար հիմք է հանդիսացել ԱԱԾ տնօրենի առաջարկը վարչապետին: Այս մասին հայտարարել է ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը խորհրդարանական ճեպազրույցի ժամանակ: 

«Նրա հետ առնչվել եմ որպես հանձնաժողովի նախագահ, ինքը և բարոյական, և մասնագիտական առումով բարձրակարգ սպա է»,-ասել է Քոչարյանը:

Թե Սահմանապահ զորքերի հրամանատարին պաշտոնից ազատելը որքանո՞վ է կապված Տեղ գյուղի դեպքերի հետ՝ Քոչարյանն ասաց, որ ինչ-որ չափով կարող է առնչություն ունենալ, բայց ծառայողական քննությունը պետք է տա պատասխան:  

«Կարող է և սահմանապահ զորքերի հրամանատարի պաշտոնազրկումը կապված չէ դրա հետ, կարող է և կապված է: Բայց, ամեն դեպքում, պաշտոնազրկման համար հիմք է հանդիսացել ԱԱԾ տնօրենի առաջարկը վարչապետին: Դա քննարկման առարկա չէ»,-նշել է Քոչարյանը:

Նա հորդորեց ազատումը չկապել միայն Տեղ գյուղի դեպքերի հետ՝ նշելով, որ դա կարող է նաև պաշտոնների տեղաշարժով պայմանավորված լինել: Եվ դա պետք է միտված լինի հետագայում սահմանապահ զորքերի, պաշտպանական գերատեսչության ստորաբաժանումների ներդաշնակ համագործակցությանը:

Հիշեցնենք, որ Հայաստանի նախագահը հրամանագիր է ստորագրել Արման Մարալչյանին Ազգային անվտանգության ծառայության սահմանապահ զորքերի հրամանատարի պաշտոնից ազատելու մասին:

Մարալչյանի պաշտոնանկությունը հաջորդում է երեկ Սյունիքի մարզի Տեղ գյուղի հատվածում՝ հայ-ադրբեջանական սահմանին տեղի ունեցած միջադեպին, որի հետևանքով հայկական կողմն ունի 4 զոհ և 6 վիրավոր: Ադրբեջանական կողմը ևս հայտնել է զոհերի մասին:

Արման Մարալչյանը ԱԱԾ սահմանապահ զորքերի հրամանատար էր նշանակվել 2020 թվականի հոկտեմբերին: