Իրանի ԱԳՆ խոսնակը` Թեհրան-Բաքու հարաբերությունների մասին
Իրանի ԱԳՆ խոսնակն այսօր անդրադարձել է Թեհրան-Բաքու հարաբերություններին: Նա նշել է, որ հարևան երկրները պետք է կենտրոնանան ընդհանուր շահերի վրա և թույլ չտան, որ ուրիշները լարվածություն ստեղծեն երկկողմ հարաբերություններում:
«Իրանը միշտ ընդգծել է երկխոսության կարևորությունը, սակայն կան թշնամիներ, որոնք չեն ցանկանում, որ հարևան, եղբայրական և մուսուլմանական Իրանն ու Ադրբեջանը բարիդրացիական հարաբերություններ ունենան»,- ասել է Նասեր Քանանին:
Իրանի ԱԳՆ խոսնակն ընդգծել է, որ Թեհրանը ձգտել է դիվանագիտական մեթոդներով նպաստել լարվածության թուլացմանը երկկողմ հարաբերություններում, և Թեհրանի նախաձեռնությամբ երկու երկրների արտգործնախարարներն ունեցել են հեռախոսազրույցներ, որոնք եղել են դրական ու կառուցողական:
«Ջանքեր են գործադրվում, որ ադրբեջանական կողմի հետ համակարգմամբ ստեղծված մթնոլորտը վերահսկվի, և հարաբերությունները բնականոն հուն վերադառնան: Կովկասի զարգացումների վերաբերյալ Իրանը դիրքորոշումը չի փոխել»,- հավելել է Քանանին:
Թեհրանը դրական է գնահատում Ադրբեջանի և Իրանի արտգործնախարարներ Ջեյհուն Բայրամովի և Հոսեյն Ամիր Աբդոլլահիանի վերջին հեռախոսազրույցը։
Հիշեցնենք, որ ապրիլի 6-ին Ադրբեջանի ԱԳՆ-ն անցանկալի անձ է հայտարարել Բաքվում Իրանի դեսպանատան չորս աշխատակցի, նրանց հանձնարարվել է 48 ժամվա ընթացքում լքել երկիրը։ Ապրիլի 7-ին Բաքվի ԶԼՄ-ները հայտնեցին, որ Իրանի դիվանագիտական ներկայացուցչության նշված աշխատակիցներն իրենց ընտանիքների հետ լքել են Ադրբեջանի տարածքը։
Քանաանին իրանցի դիվանագետների արտաքսումն անվանել է հապճեպ և անարդյունավետ քայլ։ Ինչ վերաբերում է Բաքվում Իրանի դեսպանի փոփոխության մասին ադրբեջանական լրատվամիջոցների տեղեկություններին, Քանաանին ասել է, որ դիվանագիտական աշխատողների ռոտացիան սովորական երևույթ է։
