«Այս ամենը հակամարտության զգալի ընդլայնման ռիսկեր է ստեղծում». Շոյգու

Մոսկվան ՆԱՏՕ-ին Ֆինլանդիայի անդամակցությունն անվանել է իր սահմանների մոտ դաշինքի ակտիվության աճ: Կրեմլում կարծում են, որ դա Ուկրաինայում հակամարտության լուրջ ընդլայնման ռիսկեր է ստեղծում։

«Մենք ուշադիր հետևելու ենք, թե ինչ է տեղի ունենում Ֆինլանդիայում, ինչպես է Հյուսիսատլանտյան դաշինքը շահագործելու Ֆինլանդիայի տարածքը՝ զենք և ենթակառուցվածքային համակարգեր տեղադրել այնտեղ, որոնք մոտ կլինեն մեր սահմաններին և կարող են սպառնալ մեզ: Կախված դրանից՝ միջոցներ կձեռնարկվեն»,- ասել է ՌԴ նախագահ Վլադիմիր Պուտինի մամուլի քարտուղար Դմիտրի Պեսկովը։

Ռուսաստանի Դաշնության պաշտպանության նախարարությունը նույնպես բացասաբար է արձագանքել լուրերին։

«Իհարկե, այս ամենը հակամարտության զգալի ընդլայնման ռիսկեր է ստեղծում, բայց դա չի ազդի հատուկ գործողության արդյունքի վրա»,- ասել է պաշտպանության նախարար Սերգեյ Շոյգուն։ 

Նրա խոսքով՝ ՆԱՏՕ-ն «ուժեղացնում է իր հակառուսական կուրսը» և հանգեցնում է հակամարտության սրման՝ մեծացնելով Ուկրաինային ռազմական օգնությունը տանկերով և ժամանակակից զրահատեխնիկայով, ինչպես նաև հեռահար սպառազինությամբ։